जळगाव, दि. ५ ऑगस्ट – जळगाव शहरातील आंबेडकर मार्केट परिसरातून देशी बनावटीचे पिस्टल आणि पाच जिवंत काडतुसे बाळगणाऱ्या २४ वर्षीय युवकाला स्थानिक गुन्हे शाखेने अटक केली. संशयित आरोपीच्या ताब्यातून सुमारे ₹४०,००० किमतीचे शस्त्र जप्त करण्यात आले आहे.
यावल पोलीस ठाण्यात दाखल गुन्ह्याच्या तपासातून ही माहिती समोर आली होती. त्यानुसार, अक्षय अजय जयस्वाल (वय २४, रा. शिवाजी नगर, जळगाव) याच्याकडे बेकायदेशीर शस्त्र असल्याचे निष्पन्न झाल्यानंतर पोलीस निरीक्षक संदीप पाटील यांच्या मार्गदर्शनाखाली पोउपनि शरद बागल यांच्या पथकाने तात्काळ कारवाई केली.
जयस्वालला आंबेडकर मार्केट परिसरातून ताब्यात घेण्यात आले. त्याच्या मोटारसायकलच्या सीटखाली एक देशी पिस्टल व ५ जिवंत काडतुसे सापडली. सदर कारवाई पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते व उपविभागीय अधिकारी संदीप गावीत यांच्या मार्गदर्शनाखाली पार पडली.
कारवाईत पो.हे.का. अकरम शेख, मुरलीधर धनगर, प्रविण भालेराव, नितीन बाविस्कर, किशोर सोनवणे, सिध्देश्वर डापकर, रविंद्र कापडणे आणि गोपाल पाटील सहभागी होते.
