अमरावती प्रतिनिधी:-
अमरावती येथे विभागीय आयुक्त कार्यालयाच्या वतीने दिनांक ३१ ऑगस्ट २०२५ रोजी शासनाच्या वतीने आयोजित “भटक्या-विमुक्त दिवस” मोठ्या उत्साहात आणि सामाजिक जाणिवा जागवणाऱ्या वातावरणात पार पडला. या कार्यक्रमात विविध भटक्या आणि विमुक्त जमातींच्या प्रश्नांवर चर्चासत्र आयोजित करण्यात आले होते. समाजातील मागासवर्गीय घटकांच्या सर्वांगीण विकासासाठी शासनाच्या धोरणांचा आणि योजनांचा आढावा घेतला गेला.
या कार्यक्रमात वडार समाजाचे प्रतिनिधित्व करत महाराष्ट्र राज्यातील वडार समाज संघाचे विदर्भ अध्यक्ष मा. महादेव विठ्ठल कुसळकर यांनी प्रभावीपणे समाजाच्या हक्कांचा आणि प्रश्नांचा मुद्दा मांडला. त्यांनी वडार समाजाच्या शैक्षणिक, सामाजिक, आर्थिक विकासासाठी अधिक ठोस योजना राबवण्याची मागणी करताना शासनाचे लक्ष वेधले.
कुसळकर यांनी आपल्या भाषणात वडार समाजाच्या पिढ्यानपिढ्या चालत आलेल्या हालअपेष्टा, मजुरीवर अवलंबून राहणारे जीवनमान, शिक्षणातील अडथळे आणि आरक्षणाच्या योग्य अंमलबजावणीच्या मुद्द्यांवर थेट प्रकाश टाकला. तसेच भटक्या-विमुक्त समाजासाठी शासनाने घोषित केलेल्या विविध योजनांचा खराखुरा लाभ प्रत्यक्ष समाजापर्यंत पोहोचावा यासाठी यंत्रणेला अधिक सक्रिय करण्याची मागणी केली.
कार्यक्रमादरम्यान विविध समाजघटकांच्या प्रतिनिधींनी एकत्र येऊन सामाजिक न्याय आणि हक्कांसाठी एकत्रित लढा देण्याचा संकल्प केला. अमरावती विभागीय आयुक्त कार्यालयात झालेला हा कार्यक्रम समाजातील वंचित घटकांच्या आवाजाला एक प्रभावी व्यासपीठ ठरला.
या कार्यक्रमाला स्थानिक प्रशासकीय अधिकारी, विविध भटक्या-विमुक्त जमातींचे नेते आणि कार्यकर्ते उपस्थित होते. कार्यक्रमाच्या यशस्वी आयोजनामुळे समाजात उत्साहाचे वातावरण निर्माण झाले असून, या निमित्ताने समाजातील एकात्मतेचा संदेशही दृढ झाला.
०००००
