पिंपरी चिंचवड:-पिंपरी चिंचवड महापालिकेच्या प्राथमिक शिक्षण विभागाने पालकांच्या तक्रारीनुसार चिंचवडगावातील एल्प्रो इंटरनॅशनल स्कूलची सुनावणी लावली होती. मात्र, त्या सुनावणीला शाळा गैरहजर राहिली. परिणामी संतप्त पालकांनी ‘आम्ही फसलो, तुम्ही नका फसू! आमच्या मुलांचे भवितव्याचे काय?’ अशा आशयाचे फलक लावून शहरात खळबळ उडवून दिली आहे. शहरात सध्या या फलकाचीच चर्चा रंगली आहे.
कोरोनाच्या पार्श्वभूमीवर सगळ्या शाळा ऑनलाइन भरत आहेत. शुल्क मात्र तेवढेच आकारले जात असल्याप्रकरणी एल्प्रो शाळेविरूद्ध पॅरेंट्स असोसिएशनने महापालिकेच्या शिक्षण विभागाकडे रीतसर लेखी तक्रार केली आहे. त्यानुसार या विभागाने शाळेला सुनावणीला बोलावले होते.
परंतु, शाळेने आमच्याकडे पालकांची एकही तक्रार नाही’, असे सांगत सुनावणीला गैरहजेरी दर्शविली. दुसरीकडे कायद्याला न जुमानणाऱ्या शाळेविरूद्ध पालकांनी शाळेसमोर, चिंचवडगावातील अहिंसा चौक आणि दर्शन हॉलसमोर फलक लावले आहेत.
‘आम्ही फसलो, तुम्ही नका फसू! आमच्या मुलांचे भवितव्याचे काय?’, असे प्रश्न शाळा व्यवस्थापनाला फलकाद्वारे उपस्थित केला आहे.
