परभणी : पाथरी हीच साईबाबांची जन्मभूमी आहे, अशा प्रबळ भावना व्यक्त करत शहरासह ग्रामीण भागातील साईभक्त सद्गुरू भूमी ते जन्मभूमी (सेलू ते पाथरी) रविवारी काढण्यात आलेल्या पायी महादिंडी सोहळ्यात सहभागी झाले.
पाथरीचे नामकरण साईधाम करावे तसेच पाथरी हीच साईबाबांची जन्मभूमी आहे. या पाथरीकरांच्या आंदोलनाला पाठिंबा म्हणून ही २६ किलोमीटरच्या या पायी महादिंडी सोहळ्याला रविवारी सकाळी सात वाजता साईबाबांचे सद्गुरू श्री केशवराज बाबासाहेब महाराज (व्यंकुशाह) मंदिरापासून सुरूवात झाली. यावेळी आमदार मेघना बोर्डीकर, माजी आमदार रामप्रसाद बोर्डीकर, नगराध्यक्ष विनोद बोराडे, बाजार समितीचे सभापती दिनकर वाघ, उपनगराध्यक्ष प्रभाकर सुरवसे, जिल्हा परिषदेचे माजी अर्थ व बांधकाम सभापती अशोक काकडे, जयप्रकाश बिहाणी, नंदकिशोर बाहेती, डॉ. शरद कुलकर्णी, पाथरी येथील साई स्मारक समितीचे अध्यक्ष सीताराम धानू, ॲड. अतुल चौधरी, संजय भुसारी, कुलकर्णी, राजेंद्र वाढोणकर, सतीश दिग्रसकर, श्री केशवराज बाबासाहेब महाराज (व्यंकुशाह) संस्थानचे विश्वस्त, जीर्णोद्धार समितीचे पदाधिकारी, संयोजन समितीचे सदस्य आदी उपस्थित होते.
स्वागतासाठी शहरासह विविध ठिकाणी सुंदर रांगोळी काढून पायी महादिंडीचे स्वागत करण्यात आले. दिडशे तोफांची सलामी देण्यात आली. दिंडीत सर्वात समोर श्री साई व सद्गुरु श्री केशवराज बाबासाहेब महाराज (व्यंकुशाह) यांचा रथ, साई जन्मभूमी पाथरी व सद्गुरु स्थान सेलू च्या २९ पुराव्याचा चित्ररुप देखावा, दहा घोडे, टाळ मृदूंग ,भजन, ध्वज, पताकांनी वातावरण भक्तिमय झाले होते. विविध सामाजिक संस्था व मित्र मंडळ यांच्यावतीने नाश्ता पाणी, शरबत आदींची व्यवस्था करण्यात आली होती. सिमुर गव्हाण येथील नरेंद्रचार्य पिठाकडून भोजन देण्यात आले.
पाथरी येथे साडे चार वाजता महाआरती झाली. यावेळी आमदार मेघना बोर्डीकर, आमदार बाबाजानी दुर्राणी, नगराध्यक्ष विनोद बोराडे, अनिल नखाते, भावना नखाते, प्रेरणा वरपुडकर व साई स्मारक समितीचे विश्वस्त उपस्थित होते. यावेळी श्री केशवराज बाबासाहेब महाराज संस्थान तर्फे माजी आमदार रामप्रसाद बोर्डीकर, सुधीर मंडलिक, अभय सुभेदार, अजित मंडलिक, मोहन खापरखुंटीकर, डॉ. प्रवीण जोग, बाबा राखे यांनी साईबाबांची पूजा केली. महाप्रसादाने दिंडीचा समारोप झाला. पायी महादिंडीत सर्वधर्मीय, सर्वपक्षीय साईभक्त मोठ्या संख्येने सहभागी झाले होते.
दिंडीसोबत चालले नगराध्यक्ष बोराडे
गेल्या पंधरा दिवसांपासून आमदार मेघना बोर्डीकर यांच्या नेतृत्वाखाली पायी महादिंडीचे नियोजन करणारे सेलूचे नगराध्यक्ष विनोद बोराडे हे रविवारी सेलू ते पाथरी असे २६ किलोमीटर दिंडी सोबत अखंड चालत राहिले. तर आमदार बोर्डीकर थोडा विसावा घेत दिंडी सोबतच होत्या. या शिवाय काही प्रतिष्ठित नागरिक, सामाजिक शैक्षणिक व राजकीय संघटनांचे पदाधिकारीही दिंडी सोबत चालत होते.
साईबाबा यांच्या जन्मभूमीसाठी आम्हाला कोणाच्याही प्रमाणपत्राची गरज नाही. साईबाबांची जन्मभूमी पाथरीच आहे. साईबाबा यांच्या जन्मभूमीला शिर्डीकरांचा विरोध होत आहे. जन्मभूमीला पाठिंबा म्हणूनच ही पायी महादिंडी आयोजित केली आहे. साईबाबांचे गुरु सेलू येथील बाबासाहेब महाराजच आहेत. यापुढे प्रत्येक तालुक्यातून पायी महादिंडी काढण्यात येतील.
- मेघना बोर्डीकर, आमदार, जिंतूर-सेलू
पाथरी (जि.परभणी) येथे साईबाबा मंदिरात महाआरती करताना आमदार मेघना बोर्डीकर, नगराध्यक्ष विनोद बोराडे, भावना नखाते, प्रेरणा वरपूडकर आदी.
