रॉयल चॅलेंजर्स बंगळूर (आरसीबी) संघाने दिल्ली कॅपिटल्सला अवघ्या ३९ चेंडूंमध्ये नऊ गडी राखून पराभूत केले. सोमवारी दिल्लीतील अरुण जेटली स्टेडियमवर खेळल्या गेलेल्या आयपीएल सामन्यात दिल्लीला १६.३ षटकांत केवळ ७५ धावा करता आल्या. प्रत्युत्तरात, आरसीबीने ६.३ षटकांत एक गडी गमावून ७७ धावा केल्या आणि सामना जिंकला. या सामन्यादरम्यान विराट कोहलीने आयपीएलमध्ये ९,००० धावा देखील पूर्ण केल्या.
दिल्लीचे वादळ: विकेट्स पडल्या
दिल्ली कॅपिटल्सला सामन्याच्या दुसऱ्याच चेंडूवर साहिल पारखच्या रूपाने पहिला धक्का बसला. आपल्या पहिल्याच आयपीएल सामन्यात साहिलला खातेही उघडता आले नाही. यानंतर एकापाठोपाठ एक विकेट्स पडल्या. यजमान संघाने अवघ्या आठ धावांत सहा विकेट्स गमावल्या. त्यानंतर डेव्हिड मिलरने अभिषेक पोरेलसोबत सातव्या विकेटसाठी ३१ चेंडूंमध्ये ३५ धावांची भागीदारी करून संघाला सावरण्याचा प्रयत्न केला. दरम्यान, धुळीचे वादळ सुरू झाल्याने सामना काही मिनिटांसाठी थांबवावा लागला. मात्र, सर्व खेळाडू मैदानावरच थांबले.
थोड्या विलंबानंतर सामना पुन्हा सुरू झाला. नवव्या षटकाच्या शेवटच्या चेंडूवर मिलर बाद झाला. त्याने तीन चौकारांसह १८ चेंडूंमध्ये १९ धावा केल्या, त्यानंतर अभिषेकने सूत्रे हाती घेतली आणि ३३ चेंडूंमध्ये ३० धावा केल्या. काईल जेमिसननेही संघाच्या धावसंख्येत १२ धावांचे योगदान दिले. आरसीबीकडून जोश हेझलवूडने १२ धावांत चार बळी घेतले, तर भुवनेश्वर कुमारने तीन बळी घेतले. रसिक सलाम दार, सुयश शर्मा आणि कृणाल पांड्या यांनी प्रत्येकी एक बळी मिळविला.
आरसीबीचा ६.३ षटकांत विजय
सोपे लक्ष्य गाठताना, आरसीबीने केवळ ६.३ षटकांत सामना जिंकला. जेकब बेथेलने विराट कोहलीसोबत २.५ षटकांत २६ धावांची भागीदारी केली. बाद होण्यापूर्वी बेथेलने ११ चेंडूंमध्ये दोन षटकार आणि एका चौकारासह २० धावा केल्या. त्यानंतर देवदत्त पडिक्कलने कोहलीसोबत २२ चेंडूंमध्ये नाबाद ५१ धावांची भागीदारी करून आरसीबीला सहज विजय मिळवून दिला. कोहली १५ चेंडूंमध्ये दोन षटकार आणि एका चौकारासह २३ धावांवर नाबाद राहिला, तर पडिक्कलने १३ चेंडूंमध्ये तीन षटकार आणि तितक्याच चौकारांसह नाबाद ३४ धावा केल्या. दिल्लीकडून काईल जेमिसनला एकमेव यश मिळाले.
विराट कोहलीने इतिहास रचला
या सामन्यात किंग कोहलीने इतिहास रचला. त्याने या स्पर्धेत ९,००० धावा पूर्ण केल्या. आयपीएलमध्ये ९,०१२ धावा करणारा विराट एकमेव फलंदाज ठरला आहे. त्याने २७५ सामन्यांमध्ये आठ शतके आणि ६६ अर्धशतकांसह ९,०१२ धावा केल्या आहेत. इतकेच नाही, तर कोहली आयपीएलमध्ये दिल्ली कॅपिटल्सविरुद्ध सर्वाधिक धावा करणारा फलंदाज ठरला आहे. त्याने दिल्ली कॅपिटल्सविरुद्ध १,१७२ धावा केल्या आहेत. एकाच संघाविरुद्ध सर्वाधिक धावा करण्याचा विक्रमही विराटच्या नावावर आहे. त्याने चेन्नई सुपर किंग्स (सीएसके) विरुद्ध १,१७४ धावा केल्या. या यादीत रोहित शर्मा तिसऱ्या स्थानावर असून, त्याने केकेआरविरुद्ध १,१६१ धावा केल्या आहेत.
विराटने तीन संघांविरुद्ध सर्वाधिक धावा केल्या आहेत.
कोहलीने आतापर्यंत दिल्ली कॅपिटल्सविरुद्ध ११७२ धावा केल्या आहेत, ज्या या संघाविरुद्ध कोणत्याही फलंदाजाने केलेल्या सर्वाधिक धावा आहेत. कोहलीने आयपीएलमध्ये तीन संघांविरुद्ध सर्वाधिक धावा केल्या आहेत. त्याने चेन्नई सुपर किंग्सविरुद्ध ११७४ धावा आणि पंजाब किंग्सविरुद्ध ११५९ धावा केल्या आहेत. रोहित शर्माने कोलकाता नाईट रायडर्स (KKR) विरुद्ध ११६१ धावा केल्या आहेत, तर डेव्हिड वॉर्नरने पंजाब किंग्सविरुद्ध ११३४ धावा केल्या आहेत.
उरलेल्या चेंडूंच्या संख्येनुसार आयपीएलमधील दुसरा सर्वात जलद यशस्वी पाठलाग
आरसीबीने दिल्ली कॅपिटल्सविरुद्ध केवळ ८१ चेंडूंमध्ये लक्ष्य पूर्ण केले. उरलेल्या चेंडूंच्या संख्येनुसार आयपीएलमधील हा दुसरा सर्वात जलद यशस्वी पाठलाग आहे. यापूर्वी, २००८ मध्ये मुंबई इंडियन्सने केकेआरविरुद्ध ६८ धावांचे लक्ष्य ८७ चेंडू शिल्लक असताना पूर्ण केले होते. तर, २०२१ मध्ये कोचीने राजस्थानविरुद्ध ९८ धावांचे लक्ष्य ७६ चेंडू शिल्लक असताना पूर्ण केले होते.
दिल्लीविरुद्ध २१वा विजय
आरसीबीने ३५ सामन्यांमध्ये दिल्लीविरुद्ध आपला २१वा विजय नोंदवला आहे. आयपीएलमध्ये कोणत्याही संघाविरुद्ध सर्वाधिक विजयांच्या बाबतीत हा सातवा क्रमांक आहे. मुंबईने केकेआरविरुद्ध ३६ पैकी २५ सामने जिंकले आहेत, जो आयपीएलमधील कोणत्याही संघाविरुद्धचा सर्वाधिक विजय आहे. आरसीबी व्यतिरिक्त, इतर पाच संघांनीही वेगवेगळ्या संघांविरुद्ध प्रत्येकी २१ सामने जिंकले आहेत.
साहिलचे पदार्पण संस्मरणीय ठरले नाही.
तत्पूर्वी, आरसीबीने नाणेफेक जिंकून प्रथम गोलंदाजी करण्याचा निर्णय घेतला. कर्णधार रजत पाटीदारने संघात कोणताही बदल केला नाही. दिल्लीने तीन बदल केले. साहिल पारखने दिल्लीसाठी पदार्पण केले. काईल जेमिसन आणि दुशमंथा चमीरा यांनाही संधी मिळाली. साहिलचे पदार्पण संस्मरणीय ठरले नाही. भुवनेश्वर कुमारने डावाच्या दुसऱ्याच चेंडूवर त्याला बाद केले. तो आपल्या पदार्पणाच्या सामन्यात खाते उघडण्यात अपयशी ठरला.
सर्वात कमी धावसंख्येत पाच गडी गमावून बसण्याचा नकोसा विक्रम कोचीच्या नावावर आहे.
दिल्लीची सुरुवात इतकी खराब झाली की त्यांचा अर्धा संघ अवघ्या सात धावांत बाद झाला. आयपीएलमध्ये इतक्या कमी धावसंख्येत पाच गडी गमावून बसण्याचा हा दुसरा सर्वात कमी विक्रम आहे. यापूर्वी, २०११ मध्ये कोची टस्कर्स केरळाने डेक्कन चार्जर्सविरुद्ध सहा धावांत पाच गडी गमावले होते. तर, या हंगामात राजस्थान रॉयल्सने सनरायझर्स हैदराबादविरुद्ध नऊ धावांत पाच गडी गमावले.
भुवनेश्वर आणि हेझलवूडने कहर केला
प्रथम फलंदाजी करताना दिल्लीची सुरुवात अत्यंत निराशाजनक झाली. आरसीबीचे वेगवान गोलंदाज भुवनेश्वर कुमार आणि जोश हेझलवूड यांनी कहर करत दिल्लीचा डाव विस्कळीत केला. साहिल बाद झाल्यानंतर, हेझलवूडने केएल राहुल आणि समीर रिझवी यांना बाद केले. त्यानंतर भुवनेश्वरने ट्रिस्टन स्टब्सला बाद केले. त्यानंतर भुवनेश्वरने दिल्लीचा कर्णधार अक्षर पटेलला बाद केले, तर हेझलवूडने नितीश राणाला बाद करून दिल्लीला सहावी विकेट मिळवून दिली आणि त्यांचा डाव उधळून लावला.
१७ वर्षांचा आयपीएल विक्रम मोडला
दिल्लीचा संघ पॉवरप्लेमध्ये केवळ १३ धावाच करू शकला, जी स्पर्धेतील पहिल्या सहा षटकांमधील सर्वात कमी धावसंख्या आहे. १७ वर्षांचा आयपीएल विक्रम मोडला गेला आहे. यापूर्वी, आयपीएलमधील सर्वात कमी पॉवरप्ले धावसंख्येचा विक्रम राजस्थान रॉयल्सच्या नावावर होता, ज्यांनी २००९ मध्ये आरसीबीविरुद्ध दोन गडी गमावून १४ धावा केल्या होत्या. अशाप्रकारे, दिल्लीने एक नकोसा विक्रम नोंदवला आहे.
पहिल्याच षटकात २९ वी विकेट
भुवनेश्वरने आपल्या पहिल्याच षटकात आरसीबीला यश मिळवून दिले. भुवनेश्वर पहिल्याच षटकात विकेट घेण्यासाठी ओळखला जातो. त्याने पहिल्याच षटकात विकेट घेण्याची ही २९ वी वेळ आहे. आयपीएलमध्ये पहिल्याच षटकात सर्वाधिक बळी घेणारा भुवनेश्वर हा दुसरा गोलंदाज आहे. या बाबतीत केवळ ट्रेंट बोल्टनेच त्याच्यापेक्षा जास्त बळी घेतले आहेत. बोल्टने आयपीएलच्या पहिल्या षटकात ३२ वेळा बळी घेतले आहेत.
आरसीबीविरुद्धच्या दारुण पराभवानंतर दिल्ली कॅपिटल्सचा कर्णधार अक्षर पटेल हताश होऊन म्हणाला की, संघाला कोणत्याही शंका-कुशंकांशिवाय पुढे जायचे आहे आणि मागील सामन्यांमधील सकारात्मक बाबींमधून शिकायचे आहे. त्याने कबूल केले की, आघाडीचे फलंदाज लवकर बाद झाल्यामुळे आणि गमावलेल्या संधींमुळे सामना गमवावा लागला, पण आता पुनरागमन करण्यावर लक्ष केंद्रित आहे. आता दिल्लीला आपल्या खेळात अमूलाग्र बदल करावे लागतील. अन्यथा आयपीएलचे पहिले विजेतेपद सोडा प्ले ऑफ गाठणेसुद्धा त्यांच्यासाठी अशक्य ठरेल.
@डॉ.दत्ता विघावे
क्रिकेट समिक्षक
मो. क्रं - ९०९६३७२०८२.
