उद्धव ठाकरेंकडून अनिल राठोड यांच्या प्रकृतीची विचारपूस
अहमदनगर (प्रतिनिधी): शिवसेना पक्ष प्रमुख व राज्याचे मुख्यमंत्री उद्धव ठाकरेंकडून माजी आमदार अनिल भैय्या राठोड यांच्या प्रकृतीची विचारपूस झाली . अनिलभैय्या घाबरू नका ,काळजी घ्या, शिवसेना व आम्ही आपल्या पाठीशी आहोत . तुमच्या प्रकृतीबाबत व इलाजबाबत कोणतीच तडजोड केली जाणार नाही . असे सांगत त्यांनी अनिल भैय्या याना दिलासा दिला .
कोरोनाबाबत संपूर्ण राज्याचा आढावा उद्धव साहेब घेत होते . त्यावेळी चर्चेत नगरचे नाव आले तेव्हा त्यांना शहराचे माजी आमदार अनिल भैय्या राठोड याना कोरोना झाल्याचे वृत्त समजले. त्यावेळी त्यांना रहावले नाही. त्यांनी लगेच शिवसेनेचे सरचिटणीस मिलिंद नार्वेकर याना भैय्याशी संपर्क साधण्याचे आदेश दिले . नार्वेकर यांनी नगर शिवसेनेचे उप जिल्हा प्रमुख गिरीश जाधव यांच्याशी मोबाईवरून संवाद साधला व माहिती घेतली . त्यावेळी गिरीश जाधव हे साईदीप हॉस्पिटल मधेच अनिल भैय्या सोबतच होते. त्यांनी तात्काळ फोन भय्यां यांना दिला . जवळ जवळ ५ मिनिटे उद्धव साहेबांचे भैय्यासोबत संभाषण सुरु होते . त्यांनी भैय्या यांच्या प्रकृतीची विचारपूस करून त्यांना धीर दिला .
संभाषणानंतर त्यांनी गिरीश जाधव यांच्याकडून दीपक डॉक्टरांचा मोबाईल नंबर घेतला . त्यानंतर त्यांनी साईदीप हॉस्पिटलचे संचालक डॉ. एस एस दीपक यांच्याशी बातचीत केली . अनिल भैय्या यांच्यावर सुरु असलेल्या उपचाराची माहिती घेतली . रुग्णालयाकडून भैय्या यांच्याबाबत कोणतीही कसर ठेऊ नका . हवे ते योग्य उपचार करा . त्यांच्या प्रकृतीबाबत आपण चिंतीत आहोत . कोणताही कठोर निर्णय घेण्याबाबत मागे पुढे पाहू नका असे त्यांनी सांगितले .
गेल्या तीन दिवसापासून अनिल भैय्या याना कोरोनाचा संसर्ग झाल्यामुळे ते साईदीप हॉस्पिटलमध्ये उपचार घेत आहेत . त्यांची प्रकृती स्थिर असल्याचे रुग्णालयाच्या वतीने सांगण्यात आले आहे. .
