बिबटच्या हल्ल्यात जखमी,चार वर्षीय मुलीची भेट घेत यंग चांदा ब्रिगेडने दिला आर्थिक मदतीचा हात..!

चंद्रपूर-किरण घाटे-

घरात शिरुन बिबटने केलेल्या हल्यात दुर्गापुर येथील 4 वर्षीय चिमुकली जखमी झाली होती. आज यंग चांदा ब्रिगेडच्या महिला आघाडीने सदरहु मुलीसह तिच्या कुटुंबीयांची भेट घेत मुलीच्या उपचारा करिता आर्थिक मदत केली आहे. यंग चांदा ब्रिगेडच्या सायली येरणे, सविता दंडारे, नंदा पंधरे, कौसर खान, आशा देशमुख, शमा काजी, माधुरी निवलकर, वंदना हजारे, भाग्यश्री हांडे, आदींची उपस्थिती होती.  

  

गत आठवड्यात दुर्गापूर येथील आदिवासी आश्रम शाळेजवळील रहिवासी असलेल्या जगजीवन कोपलवार यांच्या चार वर्षीय मुलीवर बिबटने घरात शिरुन हल्ला केला होता. यावेळी जगजीवन यांच्या पत्नीने मुलीला वाचविण्यासाठी बिबटला काठीने मारले. नंतर बिबटने तेथुन पळ काढला. मात्र या घटनेत मुलगी गंभीर जखमी झाली होती. दरम्यान आज शनिवारी आमदार किशोर जोरगेवार यांच्या सुचने नंतर यंग चांदा ब्रिगेडच्या महिला आघाडीने कोपलवार यांच्या घरी जावून जखमी मुलीच्या प्रकृतीची विचारणा केली. यावेळी तिच्या पुढील उपचारा करिता आर्थिक मदतही यंग चांदा ब्रिगेडच्या वतीने करण्यात आली आहे. या शिवाय शासनातर्फेही सदरहु मुलीला मदत मिळवून देण्यासाठी प्रयत्न करणार असल्याचे यावेळी यंग चांदा ब्रिगेडच्या महिला आघाडीने म्हटले आहे.