कृषीमंत्री ना. दत्तात्रय भरणे यांच्या माध्यमातून पुणे जि. प. च्या इंदापूर तालुक्यातील ५२ प्राथमिक शाळांची 'मॉडेल स्कूल' करण्यासाठी निवड;
दर्जेदार शिक्षणावर भर राष्ट्रवादी काँग्रेस पक्षाचे जिल्हा परिषदेचे गटनेते श्रीमंत ढोले सर यांची माहिती.
पुणे: ग्रामीण भागातील विद्यार्थ्यांना गुणवत्तापूर्ण शिक्षण आणि आधुनिक सुविधा मिळाव्यात या उद्देशाने महाराष्ट्र राज्याचे कृषीमंत्री ना. दत्तात्रय भरणे यांच्या माध्यमातून पुणे जिल्हा परिषदेच्या इंदापूर तालुक्यातील एकूण ५२ प्राथमिक शाळांची 'मॉडेल स्कूल' करण्यासाठी निवड झाली आहे. "गुणवत्तापूर्ण शिक्षण, सक्षम विद्यार्थी हेच ध्येय" डोळ्यांसमोर ठेवून हा महत्त्वपूर्ण निर्णय घेण्यात आल्याची माहिती गटनेते श्रीमंत ढोले सर यांनी दिली.
या उपक्रमांतर्गत प्रत्येक शाळा ही 'मॉडेल स्कूल' म्हणून उभी करण्याचा दृढ संकल्प पुणे जिल्हा परिषदेचे गटनेता व सदस्य श्रीमंत ढोले सर यांनी व्यक्त केला आहे.
'मॉडेल स्कूल'ची प्रमुख वैशिष्ट्ये:
या निवड झालेल्या ५२ शाळांमध्ये विद्यार्थ्यांच्या सर्वांगीण विकासासाठी खालील मुद्द्यांवर प्रामुख्याने काम केले जाणार आहे:
दर्जेदार शिक्षणाच्या नव्या संधी: ग्रामीण भागातील विद्यार्थ्यांना जागतिक दर्जाचे शिक्षण मिळवून देणे.
आधुनिक सुविधा व तंत्रज्ञानाचा वापर: डिजिटल क्लासरूम आणि तंत्रज्ञानाच्या मदतीने शिक्षण अधिक सोपे करणे.
विद्यार्थी-केंद्रित उपक्रमांना चालना: विद्यार्थ्यांच्या कलागुणांना वाव देणारे विविध उपक्रम राबवणे.
सुरक्षित, स्वच्छ व प्रेरणादायी शैक्षणिक वातावरण: शाळांचा परिसर सुंदर, निर्भय आणि अभ्यासपूरक बनवणे.
या प्रमुख शाळांचा आहे समावेश:
निवड करण्यात आलेल्या ५२ शाळांमध्ये लाखेवाडी, परांडेवस्ती, सराफवाडी, घोरपडवाडी, इंदापूर, रुई, हिंगणगाव, लाकडी, भोंगळवाडी, बावडा, शेळगाव, बोरी, रेडणी, पिंपरी, सरसोडी, आणि भिगवण यांसह परिसरातील अनेक जिल्हा परिषद प्राथमिक शाळांचा आणि त्यांच्या केंद्रांचा समावेश आहे.
"ग्रामीण भागातील एकही विद्यार्थी दर्जेदार शिक्षणापासून वंचित राहू नये, हाच आमचा प्रामाणिक प्रयत्न आहे. कृषीमंत्री दत्तात्रयमामा भरणे यांच्या मार्गदर्शनाखाली या सर्व ५२ शाळांचा कायापालट करून त्या आदर्श मॉडेल स्कूल म्हणून विकसित केल्या जातील."
— श्रीमंत ढोले सर (गटनेता, सदस्य, जिल्हा परिषद पुणे)
या निर्णयामुळे ग्रामीण भागातील पालक आणि विद्यार्थ्यांमध्ये आनंदाचे वातावरण पसरले असून, जिल्हा परिषदेच्या शाळांचा दर्जा सुधारण्याच्या दृष्टीने हे एक ऐतिहासिक पाऊल मानले जात आहे.
