महीन्यात कमावले ३० लाख; उजनीच्या पाटलाची कमाल..!!

उजनी | भारत हा कृषिप्रधान देश असला तरी सगळ्यात जास्त शेतकऱ्यांच्या आत्महत्या ह्या भारतात होतात. देशातील शेतकरी हा कायम आर्थिक संकटात दिसून येतो. याला कारणीभूत सरकारची कृषीक्षेत्रातील उदासीन धोरणे असल्याचे तज्ज्ञांचे म्हणणे आहे.

मात्र काही दिवसांपासून उजनी येथील शेतकऱ्यांसाठी वरदान ठरत असलेल्या कोथिंबीर पिकातून त्या परिसरातील शेतकरी मोठ्या प्रमाणावर उत्पन्न मिळवत आहेत असे दिसून आले आहे.

जून महिन्याच्या सुरुवातीपासूनच चांगला पाऊस झाल्याने बहुसंख्य शेतकऱ्यांनी मूग, उडीद, सोयाबीन यासारख्या पारंपरिक पिकांना प्राधान्य देऊन त्यांची पेरणी केली होती. परंतु या वर्षी शेतकऱ्यांच्या शेतात सोयाबीन उगवलेच नाही.

त्यामुळे अनेक शेतकरी आर्थिक अडचणीत सापडले होते. यातील अनेकांनी सोयाबीनची पुन्हा पेरणी न करता कोथिंबीर पिकाची लागवड केली. ज्या शेतकऱ्यांनी जून, जुलै आणि ऑगस्टला कोथिंबीर उत्पादन घेतले होते त्यांना मोठ्या प्रमाणात फायदा झाला आहे. त्यांनी यामधून लाखो रुपयांचा फायदा मिळवला आहे.

एकंदरीत उजनी येथील शेतकऱ्यांमध्ये आनंदाचे वातावरण आहे. उजनी येथील प्रगतिशील शेतकरी योगीराज पाटील यांनी जुलै व ऑगस्ट महिन्यात अवघ्या १३ एकरात एकूण ३० लाख ८० हजाराचे यशस्वी उत्पन्न मिळवले आहे.

तंत्रज्ञानाचा योग्य वापर त्याचवेळी पिकाला योग्य भाव व कमी उत्पादन खर्च यामुळे कोथिंबीर पिकातून त्यांना भरघोस उत्पन्न मिळाले आहे. गावरान शेणखत वापरलेल्या जमिनीवर जुलै महिन्याच्या मध्यंतरी कोथिंबीर पिकाच्या घरगुती बियाणांची ट्रॅक्टरद्वारे पेरणी त्यांनी केली.

घरगुतीबियाणे असल्याने त्यांना त्याचा अधिक फायदा झाला. दहा दिवसांत पिकाची उगवण झाली. २० व्या दिवशी त्यांनी खुरपणी केली. ज्यामुळे पिकाची योग्य वाढ झाली. तसेच पिकाला रोगापासून वाचवण्यासाठी त्यांनी एकूण ४ फवारण्या केल्या. त्याचा फायदा पिकाच्या वाढीसाठी आणि योग्य रंग येण्यासाठी झाला.

पाटील यांनी गावात एक नवा आदर्श निर्माण केला असून शेतामध्ये नवनवीन प्रयोग करण्याची त्यांची आवड आहे. नियमित रोज पहाटे पाच वाजता शेतात जाऊन ते पूर्ण दिवसाच्या कामाचे नियोजन करतात. राजकीय जीवनातून वेळ काढून त्यांनी एकदम तंत्रशुद्ध पद्धतीने शेती करण्यासाची कला त्यांच्या अंगात आहे. हेच त्यांच्या प्रगतीचे सिक्रेट आहे.