प्रतिनिधी। मोहन शेगर :
सोनई :सावित्रीबाई फुले पुणे विद्यापीठार्फे वर्धापनदिनानिमित्ताने दिल्या जाणाऱ्या विविध नामवंत पुरस्कारांची घोषणा नुकतीच करण्यात आली असून त्यात मुळा एज्युकेशन सोसायटीचे सोनई येथील कला, वाणिज्य व विज्ञान महाविद्यालायचे प्राचार्य डॉ. शंकर लावरे यांना सन 2021 यावर्षीचा 'उत्कृष्ट प्राचार्य' हा शैक्षणिक क्षेत्रात महत्त्वाचा व मानाचा समजला जाणारा पुरस्कार जाहीर झाला आहे. डॉ. लावरे यांना पुरस्कार जाहीर होताच मुळा एज्युकेशन सोसायटी व सोनई महाविद्यालयात एकाच आनंदोत्सव साजरा करण्यात आला.
सावित्रीबाई फुले पुणे विद्यापीठाकडून प्राचार्य डॉ. शंकर लावरे यांना विद्यार्थी व शिक्षक यांच्या शैक्षणिक गुणवत्ता वाढीसाठी केलेल्या योगदानाबहल हा पुरस्कार देऊन सन्मानित करण्यात आले आहे. शैक्षणिक गुणवत्ता, व्यावसायिकता, संशोधन नवकल्पना आणि महाविद्यालय व्यवस्थापन इत्यादी सेवांची गुणवत्ता आणि योगदान या निकषांच्या आधारे हा पुरस्कार देण्यात आला.
प्राचार्य लावरे यांचा नेहमी नाविन्यपूर्ण उपक्रमांवर भर असतो. त्यांचे 4 पेटेंट, 100 राष्ट्रीय आणि अंतरराष्ट्रीय शोध निबंध, 15क्रमिक पुस्तके व 4 आंतरराष्ट्रीय संदर्भग्र॑थ प्रकशित झाले आहेत. त्यांच्या मार्गदर्शनाखाली पुणे विद्यापीठात बारा विद्यार्थ्यानी पीएचडी संशोधन पूर्ण केले.
ग्रामीण भागातील विद्यार्थी-विद्यार्थिनींना उत्कृष्ट व दर्जेदार शिक्षण मिळावे या उदात्त हेतूने मुळा एज्युकेशन सोसायटी नेहमी प्रयत्नशील असते.डॉ लावरे यांना मिळालेल्या पुरस्काराने मुळा एज्युकेशन सोसायटीमध्ये काम करणाऱ्या सर्वच सेवकांचा एकप्रकारे सन्मान झाला आहे व तो सर्वांना प्रेरणादायी आहे.
मुळा एज्युकेशन सोसायटीचे शिक्षकवृंद मा खा यशवंतरावजी गडाख साहेब यांच्या मार्गदर्शनाखाली गुणवत्तापूर्ण शिक्षणासाठी काम करत असतात. संस्थेसाठी काम करणाऱ्या प्राचार्य डॉ. शंकर लावरे यांना मिळालेला प्रतिष्ठेचा उत्कृष्ट प्राचार्य' पुरस्कार व त्यांच्या शैक्षणिक क्षेत्रातील कामगिरीचा माझ्यासह संपूर्ण मुळा एज्युकेशन परिवाराला अभिमान आहे.
- प्रशांत गडाख, अध्यक्ष, मुळा एज्युकेशन सोसायटी.
