दीपावलीचा प्रकाश
आहे दीपप्रज्वलन,
अंतरंगी उजळले
हे जीवन संजीवन !
माणुसकीचे संदर्भ
आहेत प्रकाशरात्री,
अमावसेच्या अंधारी
दान असावं सत्पात्री !
दिन दिन दिवाळी ही
गायवासरांना जपू ,
नरकासूर मनात
त्यालाच आधी संपवू !
दिवाळीचा गोडवा हा
जनमनात रुजावा,
ज्योतीने ज्योत लावू ही
माणूस मात्र पूजावा !
माणुसकीचा उजेड
आहे अर्थ दिवाळीचा ,
संकटात हात देऊ
क्षण हा देवदर्शनाचा !
लक्ष्मीचे पूजन घरी
धनधान्य सोबतीला ,
शेती मातीचे स्तोत्र हे
सार्थ करी मानवाला !
तेजोमय दिवाळीचे
सामर्थ्य माणुसकीला ,
जीवन म्हणजे गती
अनुभवी प्रवाहाला !
आनंदाचे,सुखाचे हे
प्रकाशपर्व नात्यांचे ,
आकाशकंदील दारी
मोल सांगे संस्कृतीचे !
दारोदारीच्या पणत्या
सांगतात स्त्रीसन्मान ,
रांगोळीच्या रेषा रंगी
अंगणाला देई मान !
मानवी संस्कृती आहे
सत्य, शिव, सुंदराची ,
दिवाळी सांगते अर्थ
पूजा करू निसर्गाची !
आहे दीपप्रज्वलन
ज्ञानदीप जगी लावू ,
माणसाला माणसाचे
अंतरात देव पाहू !
दिवाळी पाडवा गोड
भाऊबीज आनंदाची,
पावित्र्य आणि चारित्र्य
दिवाळी आहे प्रेमाची !
डॉ. बाबुराव उपाध्ये, श्रीरामपूर - 9270087640
संकलन:
समता न्यूज नेटवर्क,श्रीरामपूर - 9561174111
