जळगाव | दि. २६ नोव्हेंबर : एमआयडीसी पोलीस स्टेशन हद्दीत घडलेल्या गंभीर बॅग लिफ्टिंग प्रकरणाचा स्थानिक गुन्हे शाखेने काहीच दिवसांत वेगवान उलगडा करत तब्बल आठ लाखांची रोकड जप्त केली. भरदिवसा ज्येष्ठ नागरिकाची बॅग हिसकावून पळ काढणाऱ्या दोघांना जेरबंद करण्यात पोलिसांना यश आले असून शहरात निर्माण झालेल्या चिंतेला दिलासा मिळाला आहे.
विलास मधुकर जाधव (६७, रा. जुनी जोशी कॉलनी) हे १५ नोव्हेंबर रोजी मोठी रक्कम घेऊन जात असताना अज्ञात चोरट्यांनी त्यांची बॅग लांबवली होती. या प्रकरणी एमआयडीसी पोलीस स्टेशनमध्ये गुरनं. ८४१/२०२५ अन्वये BNS कलम ३०९(४) नुसार गुन्हा दाखल करण्यात आला होता. भरदिवसा घडलेल्या या घटनेमुळे शहरात एकच खळबळ उडाली होती.
घटनेचे गांभीर्य ओळखून पोलीस अधीक्षक डॉ. महेश्वर रेड्डी यांनी स्थानिक गुन्हे शाखेला तातडीने तपासाचे आदेश दिले. वरिष्ठ पोलीस निरीक्षक राहुल गायकवाड यांनी विशेष पथक तयार केले. तांत्रिक तपास, गुप्त माहिती आणि सातत्यपूर्ण अनुशोधनाच्या आधारे पथकाने २३ नोव्हेंबर रोजी संशयितांचा मागोवा घेत दोन आरोपींना अटक केली.
अटकेतील आरोपींमध्ये..
विजय शांताराम पाटील (४१, रा. कलावसंत नगर)
जितेंद्र छोटुलाल जाधव (४४, रा. ज्ञानदेव नगर, जुना खेडी रोड)
यांचा समावेश आहे.
दोघांची कसून चौकशी केली असता त्यांनी गुन्ह्याची कबुली दिली. त्यांच्याकडून फिर्यादीचे आठ लाख रुपये जशीच्या तशी हस्तगत करण्यात पोलिसांना यश मिळाले. आरोपींना पुढील तपासासाठी एमआयडीसी पोलिसांच्या ताब्यात देण्यात आले आहे.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी नितीन गणापुरे यांच्या मार्गदर्शनाखाली करण्यात आली. तपास पथकात वरिष्ठ पोलीस निरीक्षक राहुल गायकवाड, पीएसआय शरद बागल, सोपान गोरे, हेड कॉन्स्टेबल प्रविण भालेराव, मुरलीधर धनगर, सलीम तडवी, कॉन्स्टेबल सिद्धेश्वर डापकर, रतनहरी गिते, मयुर निकम, सचिन घुगे, प्रदीप सपकाळे आदींचा समावेश होता.
तांत्रिक मदतीसाठी ‘नेत्रम’ येथील पोकों पंकज खडसे, मुबारक देशमुख, कुंदनसिंग बयास यांचे तसेच ‘सायबर सेल’चे पोकों गौरव पाटील व मिलींद जाधव यांचे विशेष सहकार्य लाभले.
