नगर प्रतिनिधी :
धावपळीच्या युगात आणि बदलत्या काळात अनेक गोष्टी बदलतात, पण काही आठवणी आणि काही चवी मात्र काळाच्या ओघातही तशाच टिकून राहतात. याचाच प्रत्यय आज शिर्डीमध्ये आला, जेव्हा येथील सामाजिक कार्यकर्ते तुषार महाजन यांनी आपल्या शाळेतील जुन्या आठवणींना उजाळा देत आपल्या आवडत्या समोसेवाल्या काकांची भेट घेतली.
शालेय जीवनात, विशेषतः दहावीपर्यंतच्या काळात, शाळेच्या बाहेर मिळणारा गरमागरम समोसा हा विद्यार्थ्यांसाठी केवळ खाद्यपदार्थ नसून एक जिव्हाळ्याचा विषय असायचा. तुषार महाजन यांनी सांगितले की, शाळेत असताना ते दररोज या काकांकडून समोसे खात असत. मधल्या काळात शिक्षण आणि नोकरी-व्यवसायाच्या निमित्ताने अनेक वर्षे उलटली, पण आज योगायोगाने त्यांची पुन्हा भेट झाली.
आजच्या हायटेक युगात हॉटेल्स आणि रेस्टॉरंट्सची गर्दी वाढली असली, तरी रस्त्यावरच्या गाडीवर रद्दीच्या कागदावर (पेपरवर) मिळणाऱ्या समोश्याची मजा काही औरच असते. तुषार महाजन यांनी आज पुन्हा एकदा त्याच जुन्या पद्धतीचा अनुभव घेतला. "बऱ्याच वर्षांनी तोच समोसा हातात घेतला आणि पहिला घास घेतल्यावर थेट शाळेच्या दिवसांत पोहोचलो. काकांच्या हाताची चव आजही तसूभरही बदललेली नाही," अशा भावना महाजन यांनी व्यक्त केल्या.
शिर्डीसारख्या तीर्थक्षेत्राच्या ठिकाणी अनेक मोठे बदल झाले आहेत, परंतु हे समोसेवाले काका आजही त्याच निष्ठेने आणि प्रामाणिकपणे आपला व्यवसाय करत आहेत. ऊन-पाऊस-वारा याची तमा न बाळगता, सायकलवर किंवा साध्या गाडीवर खवय्यांची भूक शमवणाऱ्या अशा छोट्या व्यावसायिकांमुळेच गावाचा साधेपणा टिकून आहे.
प्रतिक्रिया:
शाळा सुटली, मित्र पांगले, पण आठवणींचा धागा मात्र कायम आहे. आज काकांच्या हातचा समोसा खाताना मन भरून आले. मोठेपणी कितीही पंचपक्वान्न खाल्ले तरी शाळेच्या बाकावर मित्रांसोबत वाटून खाल्लेल्या त्या समोश्याची सर कशालाच नाही. काकांनी ती चव आणि प्रेम आजही जपून ठेवले आहे, त्याबद्दल त्यांचे आभार.
– तुषार महाजन, शिर्डी.
7666675370
