'समाज रत्न पुरस्कार' महेश लोढा आणि रंजीत गलांडे यांना जाहीर!
सामाजिक आणि सुरक्षिततेच्या क्षेत्रात उत्तुंग कामगिरी करणाऱ्या दोन दिग्गजांना यंदाचा प्रतिष्ठेचा 'समाज रत्न पुरस्कार' जाहीर झाला आहे. श्री बिरोबा महाराज चॅरिटेबल ट्रस्ट, राहाता यांच्या वतीने दिला जाणारा हा पुरस्कार सामाजिक कार्यकर्ते श्री. महेश लोढा आणि शिर्डी पोलीस स्टेशनचे कर्तव्यदक्ष पोलीस निरीक्षक श्री. रंजीत गलांडे यांना प्रदान करण्यात येणार आहे.
श्री. महेश लोढा: समाजाचा आधारवड
श्री. महेश लोढा हे श्री बिरोबा महाराज यांचे निस्सीम अनुयायी आहेत. त्यांनी श्री बिरोबा महाराजांच्या प्रेरणेने अनेक ठिकाणी मंदिरे उभारली आहेत. केवळ धार्मिक कार्य नव्हे, तर समाजातील अनेक गरीब कुटुंबातील मुलांसाठी ते आधारवड बनले आहेत. त्यांच्या या सामाजिक बांधिलकीची आणि निस्वार्थ सेवेची दखल घेऊन त्यांना हा पुरस्कार जाहीर झाला आहे.
श्री. रंजीत गलांडे: सुरक्षिततेचा रक्षक
शिर्डी पोलीस स्टेशनचे पोलीस निरीक्षक श्री. रंजीत गलांडे यांनी शिर्डी आणि परिसरात गुन्हेगारीला आळा घालण्यासाठी उल्लेखनीय कामगिरी केली आहे. त्यांनी अनेक सराईत गुन्हेगारांच्या मुसक्या आवळून त्यांना जेरबंद केले आहे. त्यामुळे पोलीस दलाची प्रतिमा जनसामान्यांमध्ये उंचावली आहे. अडचणीत असलेल्या कोणत्याही व्यक्तीने, विशेषत: महिलांनी फोन केल्यास क्षणार्धात त्यांना मदत पोहोचवण्याचे त्यांचे कार्य वाखाणण्याजोगे आहे. त्यांच्या या कर्तव्यदक्षतेमुळेच त्यांना या पुरस्काराने सन्मानित करण्यात येणार आहे.
वितरण सोहळा:
हा समाज रत्न पुरस्कार वितरण सोहळा गुरुवार, ५ मार्च २०२६ रोजी संत तुकाराम महाराज बीज निमित्त आयोजित करण्यात आला आहे. वै.ह.भ.प.सजन यशवंत सदाफळ आणि वै.भाऊसाहेब सजन सदाफळ यांच्या स्मरणार्थ उभारलेल्या जगद्गुरू संत तुकाराम मंदिर (१५ चारी) येथे हा सोहळा संपन्न होईल.
यावेळी बीज कीर्तन सेवेसाठी सकाळी १० ते १२ या वेळेत वैष्णव महाराज जाधव यांचे हरी कीर्तन होणार आहे.
पुरस्कारांचे वितरण मा. माणिकराव आहेर (प्रांत अधिकारी, महसूल विभाग), प्रा. डॉक्टर जयंतराव गायकवाड (ज्येष्ठ पत्रकार) आणि श्री. राजेंद्र आघाव (नेते) यांच्या शुभहस्ते होईल.
या कार्यक्रमास भाविकांनी मोठ्या संख्येने उपस्थित राहून लाभ घ्यावा, असे आवाहन श्री बिरोबा महाराज चॅरिटेबल ट्रस्टचे अध्यक्ष आणि विधिज्ञ श्री. रामनाथ सदाफळ यांनी केले आहे.
