क्रिकेट साहित्यातील १३ हजार लेखांचा टप्पा आणि जागतिक विक्रमांची दखल; चित्रनगरीत रंगला दिमाखदार सोहळा
मुंबई : -
भारतीय चित्रपटसृष्टीचे जनक दादासाहेब फाळके यांच्या १५६ व्या जयंतीचे औचित्य साधून मुंबईतील दादासाहेब फाळके चित्रनगरी (फिल्म सिटी) येथे आयोजित एका भव्य सोहळ्यात ज्येष्ठ क्रिकेट अभ्यासक, समिक्षक आणि पंच डॉ. दत्ता बाबुलाल विघावे यांना मानाचा 'दादासाहेब फाळके परिवार काफ (केएएफ) अवॉर्ड २०२६' प्रदान करून गौरविण्यात आले. 'प्रेस क्लब ऑफ वर्किंग जर्नालिस्ट्स' आणि 'युक्ती फिल्म प्रोडक्शन' यांच्या वतीने त्यांच्या बहुआयामी क्रीडा आणि सामाजिक कार्याची दखल घेत हा विशेष सन्मान देण्यात आला. सदर पुरस्कार दादासाहेब फाळके यांचे नातू चंद्रशेखर पुसळकर यांचे हस्ते संपन्न झाला.
क्रिकेट साहित्याचा 'हिमालय': १३ हजार लेखांचा विक्रम
डॉ. विघावे यांनी गेली अनेक दशके क्रिकेटच्या तांत्रिक आणि ऐतिहासिक बाजूंचे दस्तऐवजीकरण केले आहे. आजवर १३,००० हून अधिक लेखांच्या माध्यमातून त्यांनी क्रिकेट विश्वातील बारकावे वाचकांसमोर मांडले आहेत. त्यांच्या या अफाट सातत्याची आणि साहित्यिक सेवेची दखल राष्ट्रीय स्तरावर घेतली गेली आहे. सध्या त्यांची क्रिकेट नियमावली, पंचगिरी, श्रध्दा -अंधश्रध्दा आणि क्रीडा मानसशास्त्रावर आधारित चार पुस्तके प्रकाशन प्रक्रियेत आहेत, जे भारतीय क्रीडा साहित्यासाठी एक अनमोल ठेवा ठरणार आहेत.
जागतिक विक्रम आणि मार्गदर्शक म्हणून कार्य
आपल्या मुलासह (ऋषिकेश विघावे) सलग ३२ क्रिकेट सामन्यांमध्ये पंच म्हणून काम करण्याचा जागतिक विक्रम प्रस्थापित करणारे डॉ. विघावे यांनी केवळ मैदानावरच नव्हे, तर प्रशिक्षक म्हणूनही मोठे नाव कमावले आहे. अनेक नामांकित संस्थांमध्ये त्यांनी आंतरराष्ट्रीय खेळाडू व अनेक उदयोन्मुख खेळाडूंना तांत्रिक मार्गदर्शन दिले आहे. डॉ. विघावे यांचे नावे विविध क्षेत्रातील अत्त्युच्च कामगिरीचे पाच विश्वविक्रम आहेत.
समाजभूषण वसा आणि गुरु-शिष्य परंपरा
सामाजिक कार्याची ओढ असणाऱ्या डॉ. विघावे यांना यापूर्वी महाराष्ट्र शासनाचा 'डॉ. बाबासाहेब आंबेडकर समाज भूषण पुरस्कार' देखील मिळाला आहे. त्याचबरोबर अनेक राष्ट्रीय व आंतरराष्ट्रीय पुरस्कारही त्यांना मिळाले आहेत. जेष्ठ विचारवंत व सामाजिक कार्यकर्ते डॉ. सुधीर तारे हे डॉ. विघावे यांचे खरे दैवतरुपी गुरू आहेत. या सोहळ्यातील सुवर्णक्षण म्हणजे डॉ. विघावे यांनी हा पुरस्कार दादासाहेब फाळके यांच्या पवित्र स्मृतीस समर्पित केला आहे.
डॉ. सुधीर तारे (अध्यक्ष, ज्युरी कमिटी), डॉ. सय्यद खालिद कैस (उपाध्यक्ष), श्रीमती शशी दिप (सरचिटणीस) व त्यांच्या चमूने भारतातील २६ गुणवंतांची निवड केली. सदर कार्यक्रमास कला-क्रीडा क्षेत्रातील दिग्गज उपस्थित होते. निर्माते दिग्दर्शक रामानुजन खट्टर, राजू असरानी, महाराष्ट्र सरकारचा डॉ. बाबासाहेब आंबेडकर समाज भूषण पुरस्कार विजेते लोकशाहीर अशोकराव बागुल आदी मान्यवर उपस्थित होते.
डॉ. विघावे यांच्या या यशाबद्दल त्यांचे सर्वत्र अभिनंदन होत असून, त्यांच्या रूपाने एका खऱ्या 'क्रीडा तपस्व्याचा' सन्मान झाल्याची भावना व्यक्त होत आहे.
