पुणे : रुग्णसेवा, सामाजिक बांधिलकी आणि सेवाभावी वृत्तीच्या माध्यमातून आपले कर्तव्य प्रामाणिकपणे बजावणारे श्री. सदाशिव जाधव, वरिष्ठ अधिकारी, बी. जे. शासकीय वैद्यकीय महाविद्यालय व ससून सर्वोपचार रुग्णालय, पुणे यांचा स्वातंत्र्य दिनानिमित्त विशेष सन्मान करण्यात आला. त्यांच्या उल्लेखनीय रुग्णसेवेबद्दल त्यांना ‘सर्वोत्कृष्ट रुग्णसेवा गौरव पुरस्कार’ तसेच प्रशस्तीपत्र देऊन गौरविण्यात आले.
मुळचे म्हैसगाव, म्हाडा (जि. सोलापूर) येथील असलेले सदाशिव जाधव यांचे बालपण व पुढील जीवन वडिलांच्या नोकरीमुळे जुन्नर आणि त्यानंतर पुणे येथे घडले. विविध ठिकाणी वास्तव्यास राहूनही समाजाशी असलेली नाळ त्यांनी कायम जपली. शासकीय सेवेत कार्यरत असताना रुग्ण, त्यांचे नातेवाईक आणि सर्वसामान्य नागरिक यांच्याशी आपुलकीने वागणे, त्यांच्या अडचणी समजून घेणे आणि शक्य तेवढी मदत करण्याची त्यांची कार्यपद्धती राहिली आहे.
कोरोना महामारीच्या कठीण काळात आरोग्य व्यवस्था मोठ्या आव्हानांना सामोरी जात असताना जाधव यांनी सामाजिक व वैद्यकीय साधनसामग्री उपलब्ध करून देण्यासाठी पुढाकार घेतला. रुग्णसेवेला केवळ नोकरी न मानता ती सामाजिक जबाबदारी समजून त्यांनी केलेल्या कार्याची दखल विविध स्तरांवर घेण्यात आली.
याच सेवाभावी कार्याची दखल घेत ‘शिर्डी एक्स्प्रेस’ वृत्तसेवेच्या माध्यमातून महाराष्ट्र रत्न पुरस्काराने त्यांचा गौरव करण्यात आला. त्यानंतरही विविध सामाजिक, वैद्यकीय व सेवाभावी उपक्रमांमध्ये त्यांच्या योगदानाचा सन्मान करण्यात आला आहे. त्यामुळे मिळणारे पुरस्कार ही केवळ त्यांच्या व्यक्तिमत्त्वाची नव्हे, तर प्रामाणिकपणे केलेल्या सेवाकार्याची पावती मानली जात आहे.
दरम्यान, बी. जे. शासकीय वैद्यकीय महाविद्यालय व ससून सर्वोपचार रुग्णालय, पुणे यांच्या वतीने १५ ऑगस्ट २०२६ रोजी स्वातंत्र्य दिनानिमित्त सदाशिव जाधव यांना ‘सर्वोत्कृष्ट रुग्णसेवा गौरव पुरस्कार’ प्रदान करण्यात आला. पुरस्कारासोबत देण्यात आलेल्या प्रशस्तीपत्रात रुग्णसेवेत निष्ठा, रुग्णांप्रती आस्था, सहानुभूती आणि सेवेची भावना यांचा विशेष उल्लेख करण्यात आला आहे.
या सन्मानामुळे ‘सेवा हीच खरी साधना’ या विचाराला अधोरेखित करणाऱ्या सदाशिव जाधव यांच्या कार्याचा पुन्हा एकदा गौरव झाला आहे. शासकीय सेवेत राहूनही सामाजिक संवेदनशीलता जपणाऱ्या आणि गरजूंच्या मदतीसाठी सदैव तत्पर असणाऱ्या जाधव यांचा हा प्रवास अनेकांसाठी प्रेरणादायी ठरत आहे.
सन्मानावर सन्मान मिळत असला तरी त्यामागील सेवाभाव, माणुसकी आणि कर्तव्यनिष्ठा हीच सदाशिव जाधव यांच्या व्यक्तिमत्त्वाची खरी ओळख आहे. त्यांच्या या कार्याचे सर्व स्तरांतून कौतुक होत असून, भविष्यातही त्यांच्या हातून रुग्णसेवा व समाजसेवेचे कार्य अधिक व्यापक व्हावे, अशा शुभेच्छा व्यक्त होत आहेत.
— शिर्डी एक्स्प्रेस वृत्तसेवा
