पिस्तुल हातात घेऊन सोशल मीडियावर स्टेटस ठेवणाऱ्या चौघा विरुद्ध गुन्हा दाखल , पोलिसांनी तिघांना घेतले ताब्यात!!

प्रकाश मुंडे/ बीड जिल्हा प्रतिनिधी

विनापरवाना आणि धाक निर्माण करण्याच्या उद्देशाने अनधिकृतपणे पिस्टल सारखे अग्नीशस्त्र हातात घेऊन त्याचे फोटो सोशल मीडिया वरून व्हायरल करणाऱ्या चौघां विरुद्ध केज पोलिसांनी कारवाई करून, गुन्हा दाखल करून तिघांना ताब्यात घेतले आहे. या घटनेमुळे केज तालुक्यात खळबळ माजली आहे.

या बाबतची माहिती अशी की, सोशल मीडियाच्या व्हाट्सअप स्टेटसवर पिस्टल सारखे अग्नी शस्त्र हातात घेऊन त्या द्वारे दहशत निर्माण करून धाक बसविण्यासाठी ते फोटो व्हायरल केल्या प्रकरणी केज पोलिसांनी पोलिस निरीक्षक स्वप्नील उनवणे यांच्या मार्गदर्शनाखाली कारवाई केली. 

या प्रकरणी पोलीस हेडकॉन्स्टेबल उमेश आघाव यांच्या तक्रारी वरून गणेश अर्जुन मुंडे, रामदास जगन्नाथ मुंडे, पांडुरंग रामा मुंडे (सर्व रा. देवगांव ता. केज जि. बीड) आणि रामचंद्र परसराम ओमासे (रा. बेडा ता. जि. सांगली) या चौघा विरुद्ध केज पोलीस ठाण्यात गु. र. नं. ३८०/२०२५ भा. न्या. सं. ३५३ आणि शस्त्र अधिनियम ३/२५ नुसार गुन्हा दाखल केला आहे. 

गुन्हा दाखल होताच पोलिस निरीक्षक स्वप्नील उनवणे यांच्या मार्गदर्शनाखाली सहाय्यक पोलिस निरीक्षक वैभव मांजरमे, हेडकॉन्स्टेबल उमेश आघाव, रशीद शेख यांनी गणेश अर्जुन मुंडे, रामदास जगन्नाथ मुंडे, पांडुरंग रामा मुंडे या तिघांना ताब्यात घेतले आहे. 

या प्रकरणी सहाय्यक पोलिस उपनिरीक्षक राजू वाघमारे हे तपास करीत आहेत.

                 ------------ 

घटनास्थळ सांगली जिल्ह्यातील :- या गुन्ह्यात ताब्यात घेतलेल्या आरोपीकडे चौकशी केली असता सदर फोटो त्यांनी सांगली जिल्ह्यातून सोशल मीडियावर व्हायरल केले असल्याची माहिती मिळते. या गुन्ह्यातील आरोपी रामचंद्र परसराम ओमासे (रा. बेडा ता. जि. सांगली) याला अद्याप ताब्यात घेतले नसून शस्त्र देखील हस्तगत करण्यात आलेले नाही.