*स्वातंत्र्य सेनानींना मानवंदना देत विद्या प्रतिष्ठान इंदापूर येथे ७९ वा स्वातंत्र्य दिन साजरा*
इंदापूर, : दि. १५ ऑगस्ट** – विद्या प्रतिष्ठान, इंदापूर संकुलात ७९ वा स्वातंत्र्य दिन अत्यंत उत्साहात व देशभक्तिपूर्ण वातावरणात साजरा करण्यात आला. सकाळी ८ वाजता आयोजित ध्वजारोहण सोहळ्यात विद्या प्रतिष्ठान कॉमर्स अँड सायन्स कॉलेजचे प्राचार्य डॉ. बाळकृष्ण संदीकर यांच्या हस्ते ध्वजारोहण करण्यात आले.
यानंतर इंदापूर इंग्लिश मीडियम स्कूलच्या विद्यार्थ्यांनी देशभक्तीपर गीत आणि देशप्रेम जागवणारे नाटक सादर केले. विशेष म्हणजे विद्यार्थ्यांनी विविध सोशल फ्रीडम फायटर्सच्या वेशभूषा करून एक नाटक सादर केले, ज्यामध्ये त्यांनी स्वातंत्र्य संग्रामातील विविध टप्प्यांचे प्रभावी सादरीकरण केले.
कार्यक्रमात बोलताना प्राचार्य डॉ. संदीकर यांनी आपल्या मनोगतात स्वातंत्र्य संग्रामात योगदान देणाऱ्या सर्व स्वातंत्र्य सेनानी आणि हुतात्म्यांचे स्मरण करून त्यांच्याप्रती कृतज्ञता व्यक्त केली. त्यांनी विद्यार्थ्यांना उद्देशून सांगितले की, "आज आपण ज्यांनी आपले प्राण गमावले त्यांच्या बलिदानामुळे स्वतंत्र भारतात शिक्षण घेऊ शकतो. ही गोष्ट लक्षात ठेवून आपण सर्वांनी जबाबदार नागरिक होण्याचा संकल्प करावा."
या प्रसंगी पॉलिटेक्निक कॉलेजचे प्राचार्य डॉ. सुजय देशपांडे, तसेच इंदापूर इंग्लिश मीडियम स्कूलच्या प्राचार्या डॉ. ज्योती जगताप उपस्थित होत्या. कार्यक्रमानंतर विद्यार्थ्यांना खाऊ वाटप करण्यात आले.
विद्या प्रतिष्ठान संकुलातील सर्व शिक्षक, शिक्षकेतर कर्मचारी व विद्यार्थी यांनी कार्यक्रमात सक्रिय सहभाग घेत देशप्रेमाची भावना वृद्धिंगत केली.
---
