आ. नमिता मुंदडांच्या पाठपुराव्याला मोठे यश; शहरातील भारनियमन, कमी व्होल्टेजच्या समस्यांवर कायमस्वरूपी तोडगा
अंबाजोगाई शहरातील वीजपुरवठा अधिक स्थिर आणि दर्जेदार करण्यासाठी एक महत्त्वपूर्ण पाऊल उचलण्यात आले आहे. जिल्हा नियोजन समिती (DPC) वार्षिक कार्यक्रम 2025 अंतर्गत अंबाजोगाईच्या आमदार नमिता अक्षय मुंदडा यांच्या अथक प्रयत्नांना यश मिळाले असून, महावितरणच्या विविध विकासकामांसाठी १ कोटी २० लाख रुपयांचा निधी मंजूर झाला आहे. या निर्णयामुळे शहरवासियांना भारनियमन, कमी व्होल्टेज आणि वारंवार येणाऱ्या तांत्रिक अडचणींपासून मोठा दिलासा मिळणार आहे.
काय आहेत प्रमुख कामे?
मंजूर झालेल्या कामांमध्ये शहराच्या प्रमुख भागांमध्ये नवे रोहित्र (ट्रान्सफॉर्मर) बसवणे आणि विद्यमान रोहित्रांची क्षमता वाढवणे यांचा समावेश आहे. यामुळे वीज वितरण व्यवस्था अधिक मजबूत होणार आहे.
या प्रमुख परिसरांना मिळणार थेट लाभ:
नवे ट्रान्सफॉर्मर बसवणे आणि क्षमता वाढवणे: सावरकर चौक, छत्रपती शिवाजी महाराज चौक, गवळीपुरा, मुंदडा डीपी, फॉलोवर्स कॉलनी, बेजगेमवार डीपी, गॅस गोडाऊन, एसबीआय बँक परिसर, थोरात डीपी, महाराष्ट्र बँक.
इतर परिसर: मिल्लत नगर, ओल्ड मोदी डीपी, तथागत चौक, योगेश्वरी नगरी, सिद्धार्थ नगर, बालाघाट नगर आणि मुकादम डीपी (पोखरी रोड).
'विकास प्रक्रियेस मिळणार गती':
शहरातील वाढत्या गरजेनुसार हा निधी मिळाल्याने वीज वितरण व्यवस्था मजबूत होईल, अशी अपेक्षा आहे. याचा थेट लाभ औद्योगिक, व्यापारी आणि निवासी विभागांना होणार आहे, ज्यामुळे शहराच्या विकासाला गती मिळेल.
आमदार नमिता मुंदडा यांनी मूलभूत सुविधांच्या उभारणीसाठी केलेल्या सातत्यपूर्ण पाठपुराव्यामुळे हा महत्त्वाचा निर्णय घेण्यात आला आहे. त्यांनी मुख्यमंत्री देवेंद्र फडणवीस, उपमुख्यमंत्री तथा बीडचे पालकमंत्री अजित पवार, उपमुख्यमंत्री एकनाथ शिंदे, आणि मंत्री पंकजाताई मुंडे यांचे निधी उपलब्ध करून दिल्याबद्दल आभार मानले आहेत. तसेच, पुढील काळात उर्वरित पायाभूत प्रकल्पांसाठीही निधी उपलब्ध करून देण्याचे आश्वासन त्यांनी दिले आहे.
