विठ्ठलराव पवार यांच्या हस्ते होणार ‘मानाचे प्रस्थान’; भाविकांमध्ये अलोट उत्साह
शिर्डी प्रतिनिधी: ( तुषार महाजन )
आदिमाया सप्तशृंगी मातेच्या जयघोषात आणि हरिनामाच्या गजरात कोऱ्हाळे (भांबारे मळा) येथील भक्तांची पायी दिंडी शनिवारी सप्तशृंगी गडाकडे प्रस्थान करणार आहे. 'जय हनुमान पदयात्रा मंडळ, भांबारे मळा' आणि समस्त ग्रामस्थ कोऱ्हाळे यांच्या वतीने आयोजित या भव्य पदयात्रा सोहळ्याचे हे १३ वे वर्ष असून, परिसरातील भाविकांसाठी हा एक भक्तीचा उत्सव ठरत आहे.
ह.भ.प. काशिकानंदजी महाराज यांच्या आशीर्वादाने प्रारंभ
ह.भ.प. महंत १००८ महामंडलेश्वर काशिकानंदजी महाराज यांच्या कृपाशीर्वादाने निघणाऱ्या या पदयात्रेचा शुभारंभ शनिवार, दि. १० जानेवारी २०२६ रोजी सकाळी होणार आहे. साई संस्थान एम्प्लॉईज क्रेडिट को-ऑप सोसायटीचे चेअरमन मा. श्री. विठ्ठलराव तुकाराम पा. पवार यांच्या शुभहस्ते आणि प्रमुख मान्यवरांच्या उपस्थितीत पदयात्रेचे विधिवत पूजन होऊन मानाचे प्रस्थान होईल.
पाच दिवसांचा शिस्तबद्ध प्रवास
दि. १० जानेवारी ते १४ जानेवारी २०२६ या कालावधीत हा सोहळा संपन्न होणार आहे. कोऱ्हाळे येथून निघाल्यानंतर ही दिंडी पोहेगाव, मढी, कोळपेवाडी, शिरवाडे फाटा, मानोरी, वनसगाव, वावी, गोरठाण, वडनेर भैरव, बोराळे या मार्गाने प्रवास करत मंगळवारी (दि. १३) सप्तशृंगी गडावर पोहोचणार आहे. या पाच दिवसांच्या काळात भक्तांसाठी चहा, नाश्ता आणि भोजनाची उत्तम सोय विविध दानशूर भाविकांच्या वतीने करण्यात आली आहे.
सामाजिक एकतेचे दर्शन आणि सेवेचा महायज्ञ
या धार्मिक सोहळ्यासाठी अनेक हातांनी मदतीचा खारीचा वाटा उचलला आहे. पदयात्रींसाठी टी-शर्टचे सौजन्य कोऱ्हाळे गावचे सरपंच श्री. अमोल मच्छिंद्र पा. झिंजुर्डे यांनी दिले आहे. तसेच वाघे मंडळाचे शिवमलहार लताताई साळुंके व एकनाथराव गव्हाणे यांचे सहकार्य लाभले आहे.
पदयात्रेतील पूजेचा मान श्री. सोपानराव खकाळे व श्री. नवनाथ भांबारे यांना मिळाला असून, आचारी सेवा श्री. केरुनाथ मुर्तडक व भानुदास भांबारे हे सांभाळणार आहेत. रथाची सजावट व व्यवस्था श्री. दगडू रघुनाथ भांबारे यांनी केली असून, पाणी व्यवस्था श्री. अशोक एकनाथ भांबारे यांनी केली आहे.
भाविकांना सहभागी होण्याचे आवाहन
सलग १३ वर्षांपासून सुरू असलेली ही परंपरा अखंड चालू राहावी आणि भक्तांना देवीच्या चरणी सेवा रुजू करता यावी, यासाठी जय हनुमान पदयात्रा मंडळ आणि समस्त भांबारे मळा ग्रामस्थांनी अथक परिश्रम घेतले आहेत. तरी या सोहळ्यात आणि प्रस्थानाच्या वेळी सर्व धर्मप्रेमी भाविकांनी मोठ्या संख्येने उपस्थित राहावे, असे आवाहन आयोजकांनी केले आहे.
संपर्कासाठी श्री. सोमनाथ चौधरी, श्री. तान्हाजी चौधरी, श्री. बबन डांगे आणि श्री. दगडू भांबारे यांनी पुढाकार घेतला आहे.
