१९ फेब्रुवारीला महिलांची भव्य मोटार सायकल रॅली; शिवजयंती सोहळ्यानिमित्त शहरात विविध कार्यक्रमांची रेलचेल
शिर्डी प्रतिनिधी: ( तुषार महाजन )
छत्रपती शिवाजी महाराजांच्या जयंतीनिमित्त साईनगरी शिर्डीत उत्साहाचे वातावरण निर्माण झाले आहे. 'युवा शिर्डी ग्रामस्थ' यांच्या वतीने यंदा भव्य शिवजयंती सोहळा २०२६ आणि 'शिर्डी प्रीमियर लीग' (SPL) क्रिकेट स्पर्धेचे दिमाखदार आयोजन करण्यात आले आहे. विशेष म्हणजे, या स्पर्धेत महिला प्रेक्षकांसाठी स्वतंत्र बैठक व्यवस्थेसह दररोज आकर्षक बक्षिसे आणि बंपर लकी ड्रॉमध्ये 'इलेक्ट्रिक बाईक' जिंकण्याची संधी उपलब्ध करून देण्यात आली आहे.
शिर्डी शहरात प्रथमच अशा प्रकारच्या भव्य 'डे-नाईट' क्रिकेट स्पर्धेचे आयोजन करण्यात आले आहे. 'छत्रपती शिवाजी महाराज चषक २०२६' या नावाने ही स्पर्धा दि. ११ ते १७ फेब्रुवारी २०२६ या कालावधीत पार पडणार आहे.
खेळाडूंचा उत्साह वाढवण्यासाठी आणि महिलांना या क्रीडा महोत्सवात सहभागी करून घेण्यासाठी आयोजकांनी एक अनोखा उपक्रम राबवला आहे. क्रिकेट सामने पाहण्यासाठी येणाऱ्या महिला भगिनींसाठी स्वतंत्र व सुरक्षित बैठक व्यवस्था करण्यात आली आहे. तसेच, दररोज उपस्थित राहणाऱ्या महिलांसाठी 'भव्य लकी ड्रॉ' काढण्यात येणार असून, यामध्ये वॉटर प्युरीफायर, सिलिंग फॅन, मिक्सर, टेबल फॅन आणि इस्त्री यांसारख्या उपयुक्त वस्तू जिंकण्याची संधी मिळणार आहे.
लकी ड्रॉमध्ये 'इलेक्ट्रिक बाईक'चे आकर्षण,
या स्पर्धेची सांगता मंगळवार, दि. १७ फेब्रुवारी २०२६ रोजी होणार आहे. या दिवशी काढण्यात येणाऱ्या 'भाग्यवान लकी ड्रॉ' विजेत्या भगिनीला बंपर बक्षीस म्हणून चक्क 'इलेक्ट्रिक बाईक' दिली जाणार आहे. या अनोख्या उपक्रमामुळे महिला वर्गातून मोठे कौतुक होत असून, सामन्यांना गर्दी होण्याची शक्यता आहे.
१९ फेब्रुवारीला भव्य मोटार सायकल रॅली,
शिवजयंतीच्या मुख्य दिवशी, म्हणजेच गुरुवार दि. १९ फेब्रुवारी २०२६ रोजी सकाळी ९.०० वाजता भव्य मोटार सायकल रॅलीचे आयोजन करण्यात आले आहे. या रॅलीची सुरुवात छत्रपती शिवाजी महाराज चौक, शिर्डी नगरपरिषद येथून होईल. रॅलीचे मुख्य आकर्षण म्हणजे यात सहभागी होणाऱ्या महिलांसाठी स्वतंत्र व्यवस्था करण्यात आली आहे. रॅलीसाठी विशेष झेंडा आणि फेटा महिलांना देण्यात येणार असून, पारंपरिक वेशभूषेतील महिलांचा सहभाग या सोहळ्याची शान वाढवणार आहे.
तरी या भव्य शिवजयंती सोहळ्यात आणि क्रिकेट स्पर्धेचा आनंद घेण्यासाठी सर्व शिवभक्त माता-भगिनींनी व शिर्डी ग्रामस्थांनी मोठ्या संख्येने उपस्थित राहावे, असे आवाहन 'युवा शिर्डी ग्रामस्थ' व 'शिवजयंती उत्सव समिती'च्या वतीने करण्यात आले आहे.
* स्पर्धा कालावधी: ११ ते १७ फेब्रुवारी २०२६
* ठिकाण: शिर्डी शहर (डे-नाईट सामने)
* महिलांसाठी खास: स्वतंत्र बैठक व्यवस्था आणि दररोज लकी ड्रॉ
* बंपर बक्षीस: इलेक्ट्रिक बाईक (ड्रॉ - १७ फेब्रुवारी)
* शिवजयंती रॅली: १९ फेब्रुवारी, सकाळी ९ वाजता (महिलांच्या स्वतंत्र सहभागासह)
