इंदापुरात रंगणार पैठणीचा 'महासंग्राम': रोटरी क्लब आणि झी मराठीचा महिलांसाठी अनोखा उपक्रम
हा कार्यक्रम निव्वळ एक स्पर्धा नसून तो उत्साह, रंग आणि मनोरंजनाचा एक अनोखा त्रिवेणी संगम ठरणार आहे. या स्पर्धेचे मुख्य आकर्षण म्हणजे महाराष्ट्रातील घराघरात पोहोचलेली सुप्रसिद्ध अभिनेत्री पल्लवी वैद्य यांची उपस्थिती. पल्लवी वैद्य यांच्या सहभागामुळे या सोहळ्याला एक वेगळीच ग्लॅमरस उंची प्राप्त होणार आहे. महिलांशी संवाद साधत आणि खेळांच्या माध्यमातून त्यांच्या चेहऱ्यावर हास्य फुलवत हा 'महासंग्राम' पार पडणार आहे.
स्पर्धेच्या स्वरूपाबद्दल बोलायचे झाले तर, यामध्ये विजेत्या महिलांवर बक्षिसांची मोठी बरसात केली जाणार आहे. या 'महासंग्रामात' बाजी मारणाऱ्या भाग्यवान महिलांना महाराष्ट्राची शान असलेली आकर्षक 'पैठणी' देऊन सन्मानित करण्यात येणार आहे. पैठणीसोबतच इतर अनेक भरघोस बक्षिसे जिंकण्याची संधी महिलांना मिळणार असून, प्रत्येक सहभागी महिलेचा उत्साह वाढवण्यासाठी विविध खेळांचे आणि स्पर्धांचे नियोजन करण्यात आले आहे.
हा भव्य सोहळा येत्या गुरुवारी, ९ एप्रिल २०२६ रोजी सायंकाळी ६:०० वाजता, इंदापूर नगरपालिकेजवळील जिल्हा परिषद प्राथमिक शाळा क्रमांक १ व २ च्या विस्तीर्ण मैदानावर पार पडणार आहे. या कार्यक्रमाचे यशस्वी संयोजन रोटरी डिस्ट्रिक्ट ३१३१ चे लिटरसी डायरेक्टर रो. वसंतराव मालुंजकर, क्लबचे अध्यक्ष रो. ज्ञानदेव डोंबाळे आणि सचिव रो. आप्पासाहेब बंडगर यांच्या तसेच रोटरी क्लबचे सर्व सदस्य व संचालक मंडळ यांनी केले आहे.
इंदापूर शहरातील जास्तीत जास्त महिलांनी या ऐतिहासिक सोहळ्यात मोठ्या संख्येने सहभागी होऊन कार्यक्रमाची शोभा वाढवावी व अनेक बक्षिसे जिंकावी असे आवाहन क्लबचे अध्यक्ष रो.ज्ञानदेव डोंबाळे यांनी केले आहे.
