पृथ्वीराज कपूर मेमोरियल हायस्कूल, लोणी काळभोर येथे पर्यावरण संवर्धनाचा अनोखा उपक्रम
नगर प्रतिनिधी :
समाजसेवा, पत्रकारिता आणि पर्यावरण प्रेम यांचा सुंदर संगम घडवत आदर्श पत्रकार श्री. संजयजी महाजन यांच्या वाढदिवसानिमित्त पृथ्वीराज कपूर मेमोरियल हायस्कूल, लोणी काळभोर येथे वृक्ष संवर्धन मोहीम उत्साहात राबविण्यात आली.
वाढदिवस हा केवळ केक कापून साजरा करण्याचा दिवस नसून समाजासाठी काहीतरी विधायक कार्य करण्याची संधी असते, हा सुंदर संदेश या उपक्रमातून देण्यात आला. पर्यावरणाचा समतोल राखण्यासाठी झाडे लावणे जितके महत्त्वाचे आहे, तितकेच त्यांचे संवर्धन करणेही गरजेचे आहे, याची जाणीव उपस्थित विद्यार्थ्यांना करून देण्यात आली.
या उपक्रमात लोणी स्पोर्ट क्लब खो-खो, ग्रीन फाउंडेशन, तसेच पृथ्वीराज कपूर मेमोरियल हायस्कूलचे विद्यार्थी मोठ्या उत्साहाने सहभागी झाले. विद्यार्थ्यांनी वृक्ष संवर्धनाची जबाबदारी स्वीकारत निसर्ग रक्षणाचा संकल्प केला.
संजयजी महाजन यांचा वाढदिवस सामाजिक व पर्यावरणपूरक उपक्रमाने साजरा केल्यामुळे उपस्थितांमध्ये आनंदाचे वातावरण होते. समाजासाठी सतत कार्यरत राहणाऱ्या व्यक्तिमत्त्वाच्या वाढदिवसानिमित्त अशा उपक्रमाचे आयोजन होणे ही प्रेरणादायी बाब असल्याचे उपस्थितांनी सांगितले.
या मोहिमेमुळे विद्यार्थ्यांमध्ये पर्यावरणाबद्दल जागरूकता निर्माण झाली असून, “झाडे लावा, झाडे जगवा” हा संदेश प्रत्यक्ष कृतीतून देण्यात आला.
पर्यावरण संवर्धन ही काळाची गरज असून प्रत्येकाने एक झाड लावून ते जगवण्याचा संकल्प केला, तरच भावी पिढ्यांना हिरवेगार आणि सुंदर भविष्य मिळू शकेल, असा संदेश या उपक्रमातून देण्यात आला.
