शिर्डीतील सामाजिक कार्यकर्ते नवनाथजी थोरे यांच्या सेवाभावी कार्याची दखल; आप्पासाहेब कोते व पत्रकार संजय महाजन यांच्या उपस्थितीत गौरव
नगर प्रतिनिधी : (तुषार महाजन)
शिर्डी शहरात सामाजिक कार्याच्या माध्यमातून नेहमीच समाजहिताचे उपक्रम राबविणारे तसेच साई संस्थान एम्प्लॉईज सोसायटीचे कर्मचारी व उत्कृष्ट चोपदार सेवा बजावणारे नवनाथजी थोरे यांचा त्यांच्या सामाजिक कार्यामुळे व सेवाभावी योगदानामुळे मान्यवरांच्या हस्ते सत्कार करण्यात आला.
नवनाथजी थोरे हे शिर्डी परिसरात सामाजिक कार्यकर्ते म्हणून परिचित असून, समाजातील विविध घटकांसाठी ते नेहमीच मदतीचा हात पुढे करत असतात. धार्मिक, सामाजिक तसेच सेवाभावी क्षेत्रात त्यांनी केलेल्या कार्याची दखल घेत त्यांचा सन्मान करण्यात आला. साई संस्थान एम्प्लॉईज सोसायटीचे कर्मचारी म्हणून जबाबदारी पार पाडताना त्यांनी चोपदार सेवेच्या माध्यमातून शिस्त, नम्रता आणि सेवाभाव यांचा सुंदर आदर्श निर्माण केला आहे.
या सत्कार प्रसंगी शिर्डी विविध कार्यकारी सोसायटीचे माजी चेअरमन आप्पासाहेब तुकाराम कोते यांच्या हस्ते नवनाथजी थोरे यांचा सत्कार करण्यात आला. यावेळी पत्रकार संजय महाजन यांच्यासह इतर मान्यवर उपस्थित होते. उपस्थित मान्यवरांनी नवनाथजी थोरे यांच्या सामाजिक कार्याचे कौतुक करत त्यांना पुढील वाटचालीस शुभेच्छा दिल्या.
समाजासाठी निस्वार्थ भावनेने काम करणाऱ्या व्यक्तींचा सन्मान होणे ही समाजासाठी प्रेरणादायी बाब असल्याचे यावेळी मान्यवरांनी सांगितले. नवनाथजी थोरे यांच्यासारख्या कार्यकर्त्यांमुळे समाजात सेवा, सहकार्य आणि माणुसकीची भावना अधिक दृढ होत असल्याचे मतही उपस्थितांनी व्यक्त केले.
सत्काराबद्दल नवनाथजी थोरे यांनी सर्व मान्यवरांचे आभार मानले. समाजकार्याची हीच प्रेरणा पुढेही कायम ठेवून समाजातील गरजू, सामान्य नागरिक आणि धार्मिक-सामाजिक कार्यात आपले योगदान देत राहणार असल्याचे त्यांनी सांगितले. त्यांच्या या सत्कारामुळे शिर्डी परिसरात समाधानाचे वातावरण निर्माण झाले असून, त्यांच्या सेवाभावी कार्याचे सर्वत्र कौतुक होत आहे.
