भारताने गुरुवारी ओल्ड ट्रॅफर्ड येथे बांगलादेशला पाच गडी राखून पराभूत करून २०२६ च्या महिला टी-२० विश्वचषक स्पर्धेतील उपांत्य फेरी गाठण्याच्या आपल्या आशा जिवंत ठेवल्या. शफाली वर्माच्या झंझटक्या अर्धशतकाच्या आणि शिस्तबद्ध गोलंदाजीच्या जोरावर भारतीय संघाने १६.५ षटकांत पाच गडी गमावून १३७ धावांचे लक्ष्य गाठले. तत्पूर्वी, भारताने बांगलादेशला २० षटकांत ८ बाद१३६ धावांवर रोखले होते. भारतीय संघाचे क्षेत्ररक्षण पुन्हा एकदा प्रश्नचिन्ह निर्माण करणारे ठरले, ज्यात चार झेल सुटले, तरीही गोलंदाजांनी विरोधी फलंदाजांना मोकळेपणाने खेळू दिले नाही.
बांगलादेशसाठी निगार आणि झुएरियाने डावाला आधार दिला.
नाणेफेक जिंकून प्रथम फलंदाजी करण्याचा निर्णय घेतलेल्या बांगलादेशची सुरुवात संथ झाली. रेणुका सिंग ठाकूरने दिलारा अख्तरला अवघ्या चार धावांवर बाद करून लवकरच यश मिळवले. त्यानंतर झुएरिया फर्दोस आणि सोभना मोस्तारी यांनी डाव सावरण्याचा प्रयत्न केला. जुएरियाने आक्रमक फलंदाजी करत ३० चेंडूंमध्ये पाच चौकारांसह ३३ धावा केल्या. या दोन फलंदाजांनी दुसऱ्या विकेटसाठी ५१ धावांची भागीदारी केली.
निगार सुलतानाने कर्णधारपदाला साजेशी खेळी खेळत २४ चेंडूंमध्ये ३२ धावा केल्या. तिने १४ व्या षटकात नंदिनी शर्माच्या गोलंदाजीवर चार चौकार मारून धावगती वाढवण्याचा प्रयत्न केला, पण १७ व्या षटकाच्या पहिल्याच चेंडूवर ती यष्टीचीत झाली. ती बाद झाल्यानंतर बांगलादेशचा डाव अडखळला आणि संघाला मोठी धावसंख्या उभारता आली नाही. पुनरागमन करणाऱ्या डावखुरी फिरकी गोलंदाज राधा यादवने भारतासाठी उत्कृष्ट गोलंदाजी करत चार षटकांत २८ धावा देऊन तीन बळी घेतले. श्री चरणीनेही दोन बळी घेतले, तर रेणुका सिंग ठाकूर आणि नंदिनी शर्मा यांनी प्रत्येकी एक बळी घेतला.
शेफालीच्या स्फोटक फलंदाजीने परिस्थिती सोपी केली
१३७ धावांचे लक्ष्य गाठताना भारताची सलामीवीर फलंदाज शेफाली वर्माने वेगवान सुरुवात करून दिली. तिने अवघ्या ३४ चेंडूंमध्ये ५३ धावांची शानदार खेळी केली आणि बांगलादेशी गोलंदाजांवर सतत दबाव ठेवला. शेफालीच्या अर्धशतकाने भारताच्या विजयाचा पाया रचला, ज्यानंतर मधल्या फळीतील फलंदाजांना लक्ष्य गाठण्यात कोणतीही मोठी अडचण आली नाही. भारताने १६.५ षटकांत पाच गडी गमावून लक्ष्य पूर्ण केले. बांगलादेशसाठी रितू मोनी सर्वात यशस्वी गोलंदाज ठरली. तिने चार षटकांत २९ धावा देऊन दोन बळी घेतले.
श्री चरणीने इतिहास रचला
सामन्यादरम्यान, युवा भारतीय फिरकी गोलंदाज श्री चरणीने एक मोठा टप्पा गाठला. २१ वर्षीय डावखुरी फिरकी गोलंदाज महिला टी-२० विश्वचषक स्पर्धेच्या एकाच हंगामात भारताची सर्वाधिक बळी घेणारी गोलंदाज ठरली. चरणीने बांगलादेशच्या डावाच्या शेवटच्या षटकात शोर्ना अख्तरची विकेट घेत स्पर्धेतील आपला ११वा बळी नोंदवला आणि पूनम यादवचा विक्रम मोडला. पूनमने २०२० च्या विश्वचषकात १० बळी घेतले होते. चरणीने त्याच षटकात आणखी एक बळी घेत आपल्या बळींची संख्या १२ वर नेली आणि महिला टी-२० विश्वचषक स्पर्धेच्या एकाच हंगामात भारताची सर्वात यशस्वी गोलंदाज ठरली. चरणीची प्रभावी कामगिरी संपूर्ण स्पर्धेत कायम राहिली. यापूर्वी तिने नेदरलँड्सविरुद्ध चार आणि दक्षिण आफ्रिकेविरुद्ध तीन बळी घेऊन प्रसिद्धी मिळवली होती. तसेच, तिने अलीकडेच आयसीसी महिला टी-२० आंतरराष्ट्रीय गोलंदाजी क्रमवारीत अव्वल स्थान पटकावले आहे.
विक्रमांच्या पुस्तकात नाव कोरले
चरणीच्या १२ बळींसह, महिला टी-२० विश्वचषकाच्या एकाच हंगामातील संयुक्तपणे चौथ्या क्रमांकाचा सर्वाधिक बळींचा विक्रम तिच्या नावावर आहे. ती आता न्यूझीलंडच्या अमेलिया केरच्या १५ बळींच्या सर्वकालीन विक्रमाच्या अगदी जवळ पोहोचली आहे. स्पर्धेत भारताचे अजून सामने बाकी असल्याने, चरणीला या विक्रमाला आव्हान देण्याची एक उत्तम संधी मिळेल.
एकूण बारा संघ प्रत्येकी सहा संघाच्या दोन गटात खेळत असून दोन्ही गटातील आघाडीचे दोन संघ उपांत्य फेरीसाठी पात्र ठरणार असून भारताच्या गटातून ऑस्ट्रेलियाने आपले स्थान पक्के केले आहे तर भारत व दक्षिण आफ्रिका यांच्या पैकी एकाला दुसरे स्थान मिळणार आहे. भारताने चार पैकी तीन विजय मिळवून सहा गुण मिळविले आहेत तर दक्षिण आफ्रिकेचे तीन सामन्यात चार गुण असून त्यांचे दोन आमनेने तुलनेने कमजोर नेदरलँड व बांगलादेशशी होणार आहेत. तर भारताला बलाढ्य ऑस्ट्रेलियाला हरवावेच लागेल. अन्यथा वनडे वर्ल्ड चॅम्पीयन्सचा हा प्रवास साखळीतच संपुष्टात येईल.
भारताला या स्पर्धेत गचाळ क्षेत्ररक्षण व फलंदाजीत मधल्या फळीने दगा दिला असल्याने सफाईदार खेळ करता आला नाही अन्यथा भारताला इतर समिकरणांवर विसंबून राहायची गरज भासलीच नसती. आता मात्र कांगारूं सोबत लढताना करो अथवा मरो हे सूत्रच तंतोतंत पाळावे लागेल.
@ डॉ.दत्ता विघावे
क्रिकेट समिक्षक
मो.नं. ९०९६३७२०८२.
