जामखेड, दि. १५ जुलै २०२६ :
उपविभागीय अधिकारी तथा प्रांत अधिकारी, कर्जत यांच्या आदेशानुसार दिनांक १४ जुलै २०२६ रोजी अण्णाभाऊ साठेनगर, नान्नज येथे भूमी अभिलेख विभागामार्फत सार्वजनिक जागेची शासकीय मोजणी सुरू असताना एका व्यक्तीने शासकीय कामकाजात अडथळा निर्माण केल्याची घटना घडल्याची माहिती समोर आली आहे.
तक्रारीनुसार, महेंद्र अभिमान मोहळकर यांनी घटनास्थळी येऊन मोजणीच्या कामात हस्तक्षेप केला. तसेच अण्णाभाऊ साठेनगर येथील मातंग समाजातील काही नागरिकांना जातीवाचक शिवीगाळ करून जीवे मारण्याची धमकी दिल्याचा आरोप करण्यात आला आहे.
या प्रकरणी जामखेड पोलीस ठाण्यात संबंधित व्यक्तीविरुद्ध अनुसूचित जाती व अनुसूचित जमाती (अत्याचार प्रतिबंधक) अधिनियम तसेच भारतीय न्याय संहिता, २०२३ मधील लागू तरतुदींनुसार गुन्हा नोंद करण्यात आला असून पुढील तपास सुरू आहे.
स्थानिक नागरिकांनी संबंधित व्यक्तीविरुद्ध यापूर्वीही विविध स्वरूपाच्या तक्रारी झाल्याचा दावा करत, अशा घटनांची पुनरावृत्ती रोखण्यासाठी कठोर कायदेशीर व प्रतिबंधात्मक कारवाई करण्याची मागणी केली आहे. तसेच समाजात शांतता व कायदा-सुव्यवस्था अबाधित राहण्यासाठी आवश्यक ती प्रभावी उपाययोजना करण्यात यावी, अशी अपेक्षाही व्यक्त करण्यात आली आहे.
या घटनेनंतर परिसरात काही काळ तणावाचे वातावरण निर्माण झाले होते. मात्र, पोलीस प्रशासनाने परिस्थिती नियंत्रणात आणली असून नागरिकांनी अफवांवर विश्वास न ठेवता शांतता व सुव्यवस्था राखावी, असे आवाहन करण्यात आले आहे.
सदर प्रकरणाचा पुढील तपास संबंधित पोलीस अधिकारी करीत आहेत.
