भारतीय सलामीवीर रोहित शर्माला इंग्लंड दौऱ्यादरम्यान लॉर्ड्सवर केलेल्या शानदार १३८ धावांच्या खेळीचे फळ म्हणून आयसीसीच्या ताज्या एकदिवसीय फलंदाज क्रमवारीत मोठी झेप मिळाली आहे. आंतरराष्ट्रीय क्रिकेट परिषदेने (आयसीसी) जाहीर केलेल्या साप्ताहिक क्रमवारीत, रोहितने १४ रेटिंग गुण मिळवून चौथे स्थान पटकावले आहे, ज्यामुळे तो अव्वल स्थानाच्या शर्यतीत ठामपणे सामील झाला आहे. विशेष म्हणजे आयसीसीच्या ताज्या क्रमवारीत पहिल्या चार जणांत तीन भारतीय फलंदाज आहेत.
डॅरिल मिचेलचे वर्चस्व
न्यूझीलंडचा डॅरिल मिचेल सध्या ८०२ रेटिंग गुणांसह अव्वल फलंदाजाच्या स्थानावर आहे. भारताचा शुभमन गिल केवळ एका गुणाने मागे ८०१ गुणांसह दुसऱ्या स्थानावर आहे, तर विराट कोहली ७६७ गुणांसह तिसऱ्या स्थानावर कायम आहे. रोहित शर्मा ७५८ गुणांसह चौथ्या स्थानावर पोहोचला आहे.
लॉर्ड्सवरील ऐतिहासिक शतकाचे बक्षीस
इंग्लंडविरुद्धच्या तिसऱ्या आणि निर्णायक एकदिवसीय सामन्यात रोहित शर्माने ११० चेंडूंमध्ये १३८ धावांची स्फोटक खेळी केली. या खेळीत त्याने १७ चौकार आणि पाच षटकार मारले. विशेष म्हणजे, तो ऐतिहासिक लॉर्ड्स मैदानावर एकदिवसीय शतक झळकावणारा पहिला भारतीय फलंदाज ठरला. भारताला ३८८ धावांचे मोठे लक्ष्य गाठायचे होते. तथापि, रोहितच्या शानदार खेळीनंतरही, टीम इंडिया हा सामना २७ धावांनी हरली आणि तीन सामन्यांची मालिका १-२ ने गमावली.
निवृत्तीच्या चर्चांवर रोहितचे उत्तर
मालिकेच्या निर्णायक सामन्यापूर्वी, रोहित शर्माच्या एकदिवसीय कारकिर्दीबद्दल बरीच अटकळ होती. पण त्याने आपल्या बॅटने सर्व प्रश्नांची उत्तरे दिली. सामन्यानंतर रोहित म्हणाला, "मी पदार्पण केल्यापासून माझ्याबद्दल चर्चा होत आहे आणि जोपर्यंत मी खेळत राहीन तोपर्यंत ती सुरूच राहील. माझ्यासाठी सर्वात महत्त्वाची गोष्ट म्हणजे मैदानावर चांगली कामगिरी करणे आणि संघाच्या यशात योगदान देणे. जर चर्चा नसेल, तर मजा येणार नाही."
इंग्लंडच्या खेळाडूंनाही फायदा
भारत-इंग्लंड एकदिवसीय मालिकेनंतर अनेक इंग्लिश खेळाडूंच्या क्रमवारीतही सुधारणा झाली आहे. २४९ धावा करून जो रूटने चार स्थानांची झेप घेत आठवे स्थान पटकावले आहे. बेन डकेट ११ स्थानांनी पुढे जात संयुक्त १९व्या स्थानावर पोहोचला आहे. जेकब बेथेलने पाच स्थानांची झेप घेत ६४वे स्थान मिळवले आहे. दरम्यान, इंग्लंडचा वेगवान गोलंदाज जोफ्रा आर्चर गोलंदाजांच्या क्रमवारीत तिसऱ्या स्थानावर पोहोचला आहे. त्याच्या वर अफगाणिस्तानचा रशीद खान पहिल्या आणि पाकिस्तानचा अबरार अहमद दुसऱ्या स्थानावर आहे.
आयसीसी एकदिवसीय फलंदाजी क्रमवारी
डॅरिल मिचेल न्यूझीलंड ८०२, शुभमन गिल भारत ८०१, विराट कोहली भारत ७६७, रोहित शर्मा भारत ७५८, इब्राहिम झद्रान अफगाणिस्तान ७१२, बाबर आझम पाकिस्तान ६८९, हॅरी टेक्टर आयर्लंड ६७९ , जो रूट इंग्लंड ६७४, शाई होप वेस्ट इंडिज ६७२, चरित अस्लंका श्रीलंका ६५९.
भारतासाठी सकारात्मक चिन्ह
नवीनतम आयसीसी एकदिवसीय फलंदाजी क्रमवारीत तीन भारतीय फलंदाज: शुभमन गिल, विराट कोहली आणि रोहित शर्मा अव्वल चारमध्ये आहेत. यावरून हे स्पष्ट होते की भारतीय फलंदाजी ही जागतिक क्रिकेटमधील सर्वात मजबूत फलंदाजी फळींपैकी एक आहे. विशेषतः गिल आणि रोहितच्या अलीकडील फॉर्ममुळे अव्वल क्रमांकासाठीची लढत अत्यंत रोमांचक झाली आहे.
सध्या काही दिवसांपासून भारतीय संघाला पराभवांनी पछाडलं आहे. त्या भारतीय पराभवांना फलंदाजही तितकेच जबाबदार असले तरी रोहित, कोहली व गिलने स्वतःची शान राखत देशाच्या राष्ट्रीय संघाचा सन्मान वाढवला हेही कमी नाही.
@ डॉ.दत्ता विघावे
क्रिकेट समिक्षक
मो.नं. ९०९६३७२०८२
