अहिल्यानगर | प्रतिनिधी
वाहन विक्री करताना आकर्षक जाहिराती, आधुनिक तंत्रज्ञान आणि उत्कृष्ट सेवेची हमी दिली जाते. मात्र प्रत्यक्षात अनेक ग्राहकांना वाहन खरेदीनंतर मूलभूत सेवांसाठीही प्रतीक्षा करावी लागत असल्याच्या तक्रारी समोर येत आहेत.
अहिल्यानगर येथील एका ग्राहकाने संभाजीनगर येथील शोरूममार्फत टाटा कॅपिटलच्या कर्जसुविधेद्वारे Nissan Magnite वाहन खरेदी केले. वाहन खरेदी करून दोन महिने उलटूनही वाहनाचे आरसी बुक, कायमस्वरूपी नोंदणी क्रमांक (नंबर प्लेट) आणि आवश्यक कागदपत्रे मिळाली नसल्याचा आरोप संबंधित ग्राहकाने केला आहे.
या विलंबामुळे वाहनाची तपासणी करताना पोलिसांकडून दंड भरावा लागल्याने ग्राहकाचे आर्थिक नुकसान झाल्याचे सांगण्यात आले. तसेच फास्टॅगशी संबंधित प्रक्रिया पूर्ण न झाल्याने अनेक टोल नाक्यांवर दुप्पट टोल भरावा लागत असल्याचीही तक्रार आहे. यामुळे वाहनधारकांना अनावश्यक आर्थिक व मानसिक त्रास सहन करावा लागत असल्याचे ग्राहकांचे म्हणणे आहे.
याशिवाय Nissan Magnite वाहनाच्या मागील चाकांजवळील मडगार्डची रचना अपुरी असल्याने चिखल व माती मोठ्या प्रमाणात साचते, असा दावा करण्यात आला आहे. त्यामुळे वाहन वारंवार धुवावे लागत असून त्यावर अतिरिक्त खर्च होत असल्याचीही नाराजी व्यक्त करण्यात आली आहे.
ग्राहकांचे म्हणणे आहे की, वाहन विक्रीपूर्वी दिली जाणारी आश्वासने आणि विक्रीनंतर मिळणारी प्रत्यक्ष सेवा यामध्ये मोठी तफावत दिसून येत आहे. त्यामुळे Nissan कंपनीने आणि संबंधित डीलरशिपने वाहन नोंदणी, आरसी बुक, नंबर प्लेट, कागदपत्रे वेळेत उपलब्ध करून देण्यासाठी प्रभावी व्यवस्था निर्माण करावी, तसेच वाहनाच्या रचनेतील ग्राहकांच्या तक्रारींची दखल घेऊन आवश्यक तांत्रिक सुधारणा कराव्यात, अशी मागणी होत आहे.
टीप: वरील वृत्त संबंधित ग्राहकाने केलेल्या तक्रारींवर आधारित आहे. या संदर्भात Nissan कंपनी किंवा संबंधित डीलरशिपची भूमिका उपलब्ध झाल्यास तीही प्रसिद्ध करण्यात येईल.
