बालाजी शिंदे
मान-हिंजवडी | प्रतिनिधी
मान-हिंजवडी परिसरातील गणराज ड्रायफ्रूट्स येथून खरेदी केलेल्या ड्रायफ्रूट्सच्या बॉक्समध्ये अळ्या आढळल्याचा एका ग्राहकाने दावा केल्याने परिसरात खळबळ उडाली आहे. या प्रकारामुळे अन्नपदार्थांच्या गुणवत्ता, साठवणूक आणि सुरक्षिततेबाबत प्रश्नचिन्ह निर्माण झाले असून, संबंधित प्रकरणाची तातडीने अधिकृत चौकशी करण्याची मागणी पुढे आली आहे.
संबंधित ग्राहकाच्या म्हणण्यानुसार, ड्रायफ्रूट्सचा बॉक्स खरेदी केल्यानंतर त्यामध्ये अळ्या आढळून आल्या. त्यानंतर ग्राहकाने या प्रकाराबाबत दुकान प्रशासनाकडे विचारणा केल्याचे सांगण्यात येत आहे. मात्र, अळ्या नेमक्या कोणत्या कारणामुळे आढळल्या, त्या उत्पादनाच्या गुणवत्तेशी संबंधित आहेत की साठवणूक प्रक्रियेत काही त्रुटी झाली, याबाबत अद्याप अधिकृत निष्कर्ष समोर आलेला नाही.
नमुना तपासणीची मागणी
या घटनेची सत्यता स्पष्ट करण्यासाठी संबंधित ड्रायफ्रूट्सचा नमुना घेऊन अन्न व औषध प्रशासनाने (FDA) अधिकृत प्रयोगशाळेत तपासणी करावी, अशी मागणी ग्राहकांकडून होत आहे. प्रयोगशाळेच्या अहवालातूनच संबंधित खाद्यपदार्थाची गुणवत्ता आणि सुरक्षिततेबाबत वस्तुस्थिती स्पष्ट होऊ शकणार आहे.
ग्राहकांच्या आरोग्याचा प्रश्न ऐरणीवर
ड्रायफ्रूट्ससारखे खाद्यपदार्थ थेट सेवन केले जात असल्याने त्यांच्या गुणवत्ता नियंत्रणाला विशेष महत्त्व आहे. त्यामुळे उत्पादनाची पॅकेजिंग स्थिती, उत्पादन तारीख, ‘Best Before’ तारीख, सील, साठवणुकीची पद्धत तसेच संबंधित अन्न व्यवसायाची परवानगी व नियमांचे पालन यांचीही तपासणी होणे आवश्यक असल्याची अपेक्षा व्यक्त होत आहे.
दोष कोणाचा? तपासणीनंतरच स्पष्ट होणार
ग्राहकाचा दावा गंभीर असला तरी अधिकृत तपासणी आणि प्रयोगशाळा अहवालाशिवाय कोणत्याही व्यक्ती अथवा आस्थापनाला दोषी ठरवणे योग्य ठरणार नाही. त्यामुळे FDA तपासणी करून नेमकी वस्तुस्थिती जनतेसमोर आणणार का? याकडे परिसरातील नागरिकांचे लक्ष लागले आहे.
या प्रकरणात प्रशासनाने तातडीने दखल घेऊन आवश्यक नमुने तपासणीसाठी पाठवावेत आणि अहवालाच्या आधारे सत्य परिस्थिती स्पष्ट करावी, अशी मागणी ग्राहकांकडून होत आहे. अन्नाच्या गुणवत्तेबाबतचा प्रश्न असल्याने ग्राहकांच्या आरोग्याच्या दृष्टीने या प्रकरणाची निष्पक्ष चौकशी होणे महत्त्वाचे ठरणार आहे.
0000
