मुख्यमंत्री सहायता निधीसाठी २५ हजार रुपयांचा धनादेश सुपूर्द; सामाजिक बांधिलकी जपत तृतीयपंथीय समुदायाचा स्तुत्य उपक्रम
अहिल्यानगर / प्रतिनिधी:
समाजातील प्रत्येक घटकाने एकमेकांच्या सुख-दुःखात सहभागी होऊन संकटाच्या काळात मदतीसाठी पुढे येणे, हीच खरी माणुसकी आणि सामाजिक बांधिलकी असते. याच उदात्त विचाराचे प्रत्यंतर अहिल्यानगर जिल्ह्यातील तृतीयपंथीय समुदायाने आपल्या कृतीतून घडवून आणले आहे. राज्यातील दुष्काळग्रस्त शेतकरी बांधवांना आर्थिक मदतीचा हातभार लावत तृतीयपंथीय समाजाने समाजासमोर एक आदर्श निर्माण केला आहे.
तृतीयपंथी समाज सेवा संस्था, श्रीरामपूर यांच्या पुढाकारातून अहिल्यानगर जिल्ह्यातील संपूर्ण तृतीयपंथीय समुदायाच्या वतीने महाराष्ट्रातील संकटग्रस्त व दुष्काळग्रस्त शेतकऱ्यांच्या मदतीसाठी मुख्यमंत्री सहायता निधीमध्ये २५ हजार रुपयांची आर्थिक मदत देण्यात आली. या मदतीचा धनादेश अहिल्यानगरचे जिल्हाधिकारी तथा जिल्हादंडाधिकारी डॉ. पंकज आशिया (IAS) यांच्या हस्ते सुपूर्द करण्यात आला.
यावेळी तृतीयपंथी समाज सेवा संस्थेचे पदाधिकारी व सदस्य उपस्थित होते. समाजातील एका उपेक्षित घटकाकडून शेतकरी बांधवांच्या मदतीसाठी दाखविण्यात आलेली ही संवेदनशीलता निश्चितच कौतुकास्पद असून या उपक्रमाचे सर्व स्तरांतून स्वागत होत आहे.
विशेष म्हणजे, तृतीयपंथीय समुदायाला स्वतःच्या आयुष्यात अनेक सामाजिक, आर्थिक आणि कौटुंबिक अडचणींचा सामना करावा लागतो. समाजात सन्मानाचे स्थान मिळविण्यासाठी त्यांना अनेक संघर्षांना सामोरे जावे लागते. असे असतानाही स्वतःच्या अडचणींचा विचार बाजूला ठेवून दुसऱ्याच्या दुःखात सहभागी होण्याची त्यांची भावना समाजाला माणुसकीचा मोठा संदेश देणारी आहे.
शेती हा भारतीय अर्थव्यवस्थेचा कणा असून शेतकरी हा संपूर्ण समाजाचा अन्नदाता आहे. नैसर्गिक संकटे, दुष्काळ आणि प्रतिकूल परिस्थितीमुळे शेतकरी बांधव आर्थिक अडचणीत सापडतात. अशा कठीण प्रसंगी त्यांना आधार देणे, त्यांच्या पाठीशी खंबीरपणे उभे राहणे आणि त्यांना संकटातून सावरण्यासाठी हातभार लावणे ही केवळ शासनाचीच नव्हे, तर समाजातील प्रत्येक घटकाची सामूहिक जबाबदारी आहे. याच सामाजिक जाणिवेतून तृतीयपंथीय समुदायाने मुख्यमंत्री सहायता निधीसाठी आपले योगदान दिले आहे.
या उपक्रमातून तृतीयपंथीय समाजाने केवळ आर्थिक मदतच केली नाही, तर माणुसकीला कोणत्याही जाती-धर्माचे, लिंगाचे अथवा सामाजिक परिस्थितीचे बंधन नसते, हे आपल्या कृतीतून अधोरेखित केले आहे. समाजातील प्रत्येक व्यक्ती आणि प्रत्येक घटक हा सामाजिक परिवर्तनाचा महत्त्वाचा भाग असू शकतो, याची जाणीवही या उपक्रमाने करून दिली आहे.
आजच्या काळात सामाजिक एकोपा, परस्पर सहकार्य आणि संवेदनशीलतेची नितांत गरज आहे. अशा परिस्थितीत तृतीयपंथीय समुदायाने दुष्काळग्रस्त शेतकऱ्यांसाठी पुढे केलेला हा मदतीचा हात निश्चितच प्रेरणादायी आहे. समाजातील इतर घटकांनीही अशा विधायक उपक्रमांतून गरजूंच्या मदतीसाठी पुढाकार घ्यावा, असा सकारात्मक संदेश या कार्यातून मिळत आहे.
स्वतःच्या संघर्षावर मात करत दुसऱ्यांच्या दुःखात सहभागी होणारा हाच खरा माणुसकीचा धर्म! तृतीयपंथीय समुदायाच्या या सामाजिक योगदानाचे सर्वत्र कौतुक होत असून त्यांच्या या उपक्रमाने सामाजिक बांधिलकीचा एक नवा आदर्श निर्माण केला आहे.
*वृत्त विशेष सहयोग
पत्रकार दिपक कदम - श्रीरामपूर
*वृत्त प्रसिद्धी सहयोग
समता मीडिया सर्व्हिसेस
श्रीरामपूर - 9561174111
