दादावाडीतील चाळीस खोल्या परिसरात संध्याकाळच्या सुमारास घडली घटना; २ तोळ्यांचे मंगळसूत्र लंपास; तालुका पोलीस ठाण्यात गुन्हा दाखल.
अमळनेर प्रतिनिधी - पंकज पाटील
जळगाव : शहरातील दादावाडी परिसरातील चाळीस खोल्या येथे शुक्रवारी सायंकाळी घडलेल्या एका धक्कादायक घटनेत, एका महिलेच्या गळ्यातील सोन्याचे मंगळसूत्र दुचाकीवर आलेल्या चोरट्यांनी जबरीने ओढून चोरले. या घटनेमुळे परिसरात भीतीचे वातावरण निर्माण झाले आहे.
सीमा उर्फ नम्रता संदीप पाटील (वय ४२, रा. दादावाडी) या महिला आपल्या घरासमोर असलेल्या किराणा दुकानासमोर सायंकाळी सातच्या सुमारास उभ्या होत्या. याचवेळी आनंद कॉलनीकडून एक दुचाकी येऊन थांबली. दुचाकीवर दोन इसम होते. मागे बसलेला इसम खाली उतरून दुकानात असलेल्या आशाबाई भोळे यांच्याकडे सिगारेट आहे का, अशी विचारणा करू लागला.
आशाबाईंनी नकार दिल्यावर तो इसम पुन्हा दुचाकीवर जाऊन बसला. पण अचानकपणे त्याने सीमा पाटील यांच्या गळ्यातील २ तोळे वजनाचे, सुमारे ६० हजार रुपये किमतीचे सोन्याचे मंगळसूत्र जोरात ओढून पळ काढला. दोघांनी दुचाकीवरून महामार्गाच्या दिशेने पळून जात या घटनेची धक्कादायक अंमलबजावणी केली.
या घटनेनंतर सीमा पाटील यांनी तत्काळ जळगाव तालुका पोलीस ठाण्यात धाव घेतली आणि तक्रार दाखल केली. पोलिसांनी अज्ञात दोघांविरोधात जबरी चोरीचा गुन्हा नोंदवून तपास सुरू केला आहे. परिसरातील सीसीटीव्ही फुटेज तपासले जात असून, आरोपींचा लवकरच तपास लागेल, असा विश्वास पोलिसांनी व्यक्त केला आहे.
– पुढील तपास जळगाव तालुका पोलीस करत आहेत.
