*प्रकाश मुंडे/बीड जिल्हा प्रतिनिधी*:-
केज तालुक्यातील लोखंडी सावरगाव ते मळेगाव या महत्त्वपूर्ण रस्त्याच्या Dlc (Dry Lean Concrete) कामाला सुरुवात झाली असून, या कामाच्या प्रगतीची पाहणी भाजपचे ज्येष्ठ नेते नंदकिशोर मुंदडा काकाजी यांनी केली. रस्त्याचे काम दर्जेदार आणि वेळेत पूर्ण व्हावे, यासाठी मुंदडा यांनी संबंधित अधिकाऱ्यांना आणि ठेकेदाराला सूचना दिल्या.
लोखंडी सावरगाव आणि मळेगाव या दोन गावांना जोडणारा हा रस्ता परिसरातील नागरिकांसाठी अत्यंत महत्त्वाचा आहे. रस्त्याची दुरवस्था झाली होती, त्यामुळे नागरिकांना मोठ्या अडचणींचा सामना करावा लागत होता. अखेर या रस्त्याच्या कामाला गती मिळाल्याने ग्रामस्थांनी समाधान व्यक्त केले आहे.
भाजपचे ज्येष्ठ नेते नंदकिशोर मुंदडा काकाजी यांनी प्रत्यक्ष घटनास्थळी भेट देऊन सुरू असलेल्या Dlc कामाचा बारकाईने आढावा घेतला. त्यांनी कामाच्या गुणवत्तेची तपासणी केली आणि आवश्यक त्या सुधारणा त्वरित करण्याच्या सूचना दिल्या.
मुंदडा म्हणाले की, "विकासकामे करताना गुणवत्तेशी कोणतीही तडजोड केली जाणार नाही. लोखंडी सावरगाव-मळेगाव रस्ता लवकरच चांगल्या स्थितीत नागरिकांच्या सेवेत येईल यासाठी आमचा प्रयत्न आहे. अधिकाऱ्यांनी आणि ठेकेदाराने नागरिकांच्या सोयीसाठी हे काम प्राधान्याने पूर्ण करावे."
यावेळी त्यांच्यासोबत भाजपचे स्थानिक पदाधिकारी आणि कार्यकर्ते उपस्थित होते, त्यांनी मुंदडा काकाजी यांच्या या पाहणीबद्दल समाधान व्यक्त केले. रस्ता पूर्ण झाल्यानंतर परिसरातील वाहतूक अधिक सुरळीत होऊन नागरिकांचा प्रवास सुकर होणार आहे.
