राजकोटमधील निरंजन शाह स्टेडियमवर खेळला गेलेला भारत आणि न्यूझीलंडमधील दुसरा एकदिवसीय सामना रोमांचक नव्हता, तर किवी संघाने उल्लेखनीय पुनरागमन करत एकतर्फी ठरवत मालिका १-१ अशी बरोबरीत आणली. न्यूझीलंडने हा सामना ७ विकेट्सने जिंकून मालिकेत आपल्या आशा जिवंत ठेवल्याच नाहीत तर सन २०२३ पासून टीम इंडियाविरुद्ध सलग ८ पराभवांची मालिकाही मोडली. नाणेफेक गमावल्यानंतर प्रथम फलंदाजी करावी लागलेल्या भारताने किवीज संघासमोर २८५ धावांचे लक्ष्य ठेवले. न्यूझीलंडने हे लक्ष्य ४७.३ षटकांत गाठले आणि ७ विकेट्सने सामना जिंकला.
कुलदीप यादव : - भारताचा चायनामन गोलंदाज कुलदीप यादव या सामन्यात खूप महागडा ठरला. मधल्या षटकांमध्ये तो भारतासाठी महत्त्वाची भूमिका बजावतो. तथापि, तो या सामन्यात अपयशी ठरला. कुलदीपने १० षटकांत ८२ धावा देऊन फक्त १ बळी घेतला.
प्रसिद्ध कृष्णा : - भारताचा वेगवान गोलंदाज प्रसिद्ध कृष्णाही राजकोट वनडेत अपयशी ठरला. त्याने ९ षटकांत ४९ धावा देऊन फक्त १ बळी घेतला. या सामन्यात न्यूझीलंडच्या विजयाचा नायक असलेल्या डॅरिल मिचेलचा कॅचही कृष्णाने सोडला. मिचेलने १३१ धावांची नाबाद खेळी केली.
रवींद्र जडेजा : - अनुभवी अष्टपैलू रवींद्र जडेजा या सामन्यात बॅटने किंवा बॉलने प्रभाव पाडू शकला नाही. जेव्हा त्याला बॅटने गरज होती तेव्हा जडेजा फक्त २७ धावा काढून पॅव्हेलियनमध्ये परतला. शिवाय, तो बॉलने एकही बळी घेऊ शकला नाही. जडेजाने ८ षटकांत ४४ धावा दिल्या. शिवाय लौकीकाच्या विपरीत गचाळ क्षेत्ररक्षण केले. डोळ्यासमोर असलेले सरळतीन स्टंप्स देखील त्याला उडवता न आल्याने मिचेल बचावला व सामना सर्वांच्या डोळ्यादेखत न्यूझीलंडच्या झोळीत टाकून गेला.
श्रेयस अय्यर : - न्यूझीलंडविरुद्धच्या दुसऱ्या एकदिवसीय सामन्यात उपकर्णधार श्रेयस अय्यरची बॅटही शांत राहिली. त्याने फक्त १७ चेंडूंचा सामना केला आणि फक्त ८ धावा केल्या.
मोहम्मद सिराज : - वेगवान गोलंदाज मोहम्मद सिराज न्यूझीलंडविरुद्धच्या राजकोट वनडेमध्ये एकही बळी घेऊ शकला नाही. सिराजने ९ षटकांत ४१ धावा दिल्या. हे पाच खेळाडू भारताच्या पराभवाचे प्रमुख खलनायक ठरले.
केएल राहुलचे लढाऊ शतक व्यर्थ
नाणेफेक गमावल्यानंतर आणि प्रथम फलंदाजी करण्याचा निर्णय घेतल्यानंतर, भारतीय संघाने चांगली सुरुवात केली. रोहित शर्मा (२४) आणि कर्णधार शुभमन गिल (५६) यांनी पहिल्या विकेटसाठी ७० धावा जोडल्या, परंतु मधल्या षटकांमध्ये किवीज फिरकी गोलंदाज आणि मध्यमगती गोलंदाजांनी भारतीय फलंदाजीचा कणा मोडला. विराट कोहली (२३) आणि श्रेयस अय्यर (८) स्वस्तात बाद झाल्यानंतर भारताची धावसंख्या ४ बाद ११८ झाली. अशा कठीण काळात, केएल राहुलने पुन्हा एकदा सिद्ध केले की तो मधल्या फळीतील सर्वात विश्वासार्ह फलंदाज का आहे. राहुलने ११२ धावांची नाबाद खेळी केली. या डावात त्याने ९२ चेंडूंचा सामना केला, ज्यामध्ये ११ चौकार आणि एक उत्तुंग षटकार होता. राहुलने प्रथम रवींद्र जडेजा (२७) सोबत ७३ धावांची भागीदारी करून डाव सावरला आणि नंतर शेवटच्या षटकांमध्ये आक्रमक दृष्टिकोन स्वीकारला, ज्यामुळे भारताला ७ बाद २८४ च्या आव्हानात्मक धावसंख्येपर्यंत पोहोचवले. राहुलचे हे त्याच्या एकदिवसीय कारकिर्दीतील ८ वे शतक होते.
डॅरिल मिशेलचे वादळ
विजयासाठीच्या २८५ धावांच्या लक्ष्याचा पाठलाग करताना, न्यूझीलंडनेही संथ सुरुवात केली, लवकर दोन विकेट गमावल्या. पण नंतर डॅरिल मिशेलने मैदानात जोरदार धडक दिली. मिशेलने भारतीय गोलंदाजांची लय बिघडवली आणि मैदानावर सर्वत्र फटकेबाजी केली. त्याने विल यंग (८७) सोबत तिसऱ्या विकेटसाठी १६२ धावांची मोठी भागीदारी केली आणि सामना पूर्णपणे पालटला. डॅरिल मिचेलच्या फलंदाजीने प्रचंड आत्मविश्वास दाखवला. त्याने दबाव सहन केला, त्याचे शतक पूर्ण केले आणि शेवटपर्यंत नाबाद राहिला, ज्यामुळे संघाचा विजय निश्चित झाला. मिशेलची खेळी देखील खास होती कारण त्याने फिरकी आणि वेगवान गोलंदाजी दोन्हींविरुद्ध उत्कृष्ट फूटवर्क दाखवले, कोणत्याही भारतीय गोलंदाजाला वर्चस्व गाजवू दिले नाही.
आता अंतिम लढाई
या विजयासह, न्यूझीलंडने मालिका रोमांचक समाप्तीपर्यंत पोहोचवली आहे. सन २०२३ पासून भारताकडून सलग आठ एकदिवसीय सामने गमावणाऱ्या किवीज संघाने नवव्या सामन्यात बरोबरी साधली. मालिकेतील तिसरा आणि शेवटचा एकदिवसीय सामना आता एक आभासी अंतिम सामना असेल, जो कोणता देश ट्रॉफी जिंकेल हे ठरवेल. हा सामना १८ जानेवारी रोजी इंदूरमध्ये खेळला जाईल.
भारत वनडेचा उपविश्वविजेता व चॅम्पियन ऑफ चॅम्पियन्स आहे.आगामी वनडे वर्ल्ड कप एक वर्षावर आहे. भारतीय संघात नेतृत्वापासून अनेक बदल झाले आहेत, संघात दर सामन्यागणिक प्रयोगामागे प्रयोग केले जातात. त्यामुळे खेळाडूंमध्ये असुरक्षिततेची झालेली भावना संघाच्या कामगिरीतीत असलेले असातत्यपूर्ण कामगिरीच दर्शविते. कर्णधारगिलची अपरिपक्वता, प्रशिक्षक गौतम गंभीरची मनमानी, निवड समितीची अरेरावी व बीसीसीआयची हतबलता संघात अस्थैर्थ निर्माण करत आहे.
टीम इंडिया पुढचा सामना जिंकून मालिका खिशात घालून तात्पुरती मलमपट्टी होईलही, परंतु कायमस्वरूपी सातत्यमय विजयी परंपरा चालू ठेवण्यासाठी सर्वप्रथम संघात एकता, राष्ट्रीयता व विश्वास वाढणे गरजे आहे, आणि हे सर्व करण्यात गौतम व कंपनी कमी पडत असल्याचे सध्या तरी स्पष्टपणे जाणवते हेच सर्वात मोठे सत्य आहे.
@डॉ.दत्ता विघावे
क्रिकेट समिक्षक
मो. क्रं - ९०९६३७२०८२.
