पिंपळकोठा ते रवंजे मार्गाची दयनीय अवस्था; आंदोलनाचा इशारा.
एरंडोल प्रतिनिधी –
एरंडोल तालुक्यातील पिंपळकोठा प्र.चा. ते रवंजे या दोन गावांना जोडणारा रस्ता अक्षरशः खड्ड्यांमध्ये गडप झाला आहे. पावसाळा सुरू झाला की हा रस्ता चिखलात मिसळतो आणि शेतकऱ्यांना आपल्या शेतात पोहचणेच अवघड बनते.
"रस्त्यात खड्डा की खड्ड्यात रस्ता?" असा सवाल आता स्थानिक ग्रामस्थ आणि शेतकरी विचारू लागले आहेत. दुचाकी तर दूरच, पायी चालणेही अवघड झाले असून बैलगाडीदेखील चिखलात फसते.
शेती कामे ठप्प, खत-बियाणे नेण्यात अडचणी
या रस्त्यावरच शेतशिवार असल्याने शेतकऱ्यांना रासायनिक खते, बी-बियाणे, कीटकनाशके आणि आंतर मशागतीचे साहित्य शेतात नेताना प्रचंड अडथळे येत आहेत.
रस्ता इतका खराब आहे की, शेतमजूर देखील याच मार्गाने शिवारात यायला तयार नाहीत. परिणामी, शेतातली कामे रखडली असून शेतीचा हंगाम सुरू होतानाच अडचणींत सापडलेला आहे.
२ कि.मी.चे अंतर, ७ कि.मी.चा फेरा
पिंपळकोठा ते रवंजे हे फक्त २ कि.मी.चे अंतर आहे. पण रस्त्याची दयनीय अवस्था पाहता पावसाळ्यात रिंगणगाव खर्ची मार्गे तब्बल ७ कि.मी.चा फेरा मारावा लागतो. वेळ, पैसा आणि श्रम यांची मोठी नासाडी होत आहे.
आश्वासनांपलीकडे काहीच नाही
गेल्या कित्येक वर्षांपासून दोन्ही गावांतील ग्रामस्थांनी संबंधित लोकप्रतिनिधींना आणि प्रशासनाला निवेदने दिली. तत्कालीन आमदार आणि माजी जिल्हा परिषद सदस्यांनाही वेळोवेळी विनंती करण्यात आली. मात्र, केवळ आश्वासनेच मिळाली, प्रत्यक्षात रस्त्याचे काम सुरू झाले नाही.
शेतकऱ्यांचा इशारा – आता ‘रस्ता नाय तर आंदोलन’
या संदर्भात शेतकऱ्यांनी स्पष्ट इशारा दिला आहे की, जर लवकरात लवकर रस्त्याचे काम हाती घेतले गेले नाही, तर शेतकरी रस्त्यावर उतरून आंदोलन छेडतील. “पावसात खड्ड्यात वाट शोधण्यापेक्षा आंदोलन करणं सोपं वाटतं,” असे संतप्त उद्गार काही शेतकऱ्यांनी काढले.
🟠 प्रशासनाने या समस्येकडे तातडीने लक्ष देणे गरजेचे असून, या मार्गाची डागडुजी नाही तर संपूर्ण पुनर्बांधणी व्हावी, अशी मागणी सर्व स्तरातून होत आहे.
