महिला पदाधिकाऱ्यांवर भरदिवसा हात साफ; एरंडोल शहरात एकच खळबळ!
एरंडोल प्रतिनिधी | १६ जुलै २०२५
एरंडोल तालुक्यात भरदिवसा भररस्त्यात दोन महिलांकडून तब्बल ४ लाख ६० हजार रुपयांची रोकड लंपास केल्याची धक्कादायक घटना बुधवारी घडली आहे. खडकेसिम येथील सावित्री महिला बचत गटाच्या अध्यक्षा जयश्री योगेश सुतार व सचिव संगीता भरत पाटील या स्टेट बँक, एरंडोल शाखेतून रक्कम काढून पायी घराकडे जात असताना ही घटना घडली.
सदर रक्कम त्यांनी पांढऱ्या कापडी पिशवीत ठेवलेली असताना, महाजन कलेक्शनजवळ मागून आलेल्या दुचाकीस्वार दोघांपैकी मागे बसलेल्या अज्ञात व्यक्तीने पिशवी लांबवत "धूम स्टाईल"ने पलायन केले. हे सर्व काही सायंकाळी साडेचारच्या सुमारास घडल्याने परिसरात काही क्षणातच खळबळ उडाली.
जयश्री सुतार यांच्या पायातील चप्पलमध्ये साडी अडकली, म्हणून त्यांनी हातातील पिशवी एका ओट्यावर ठेवली होती. नेमकी हाच क्षण पाहून चोरट्यांनी संधी साधली व एकाच झटक्यात पिशवी घेऊन फरार झाले.
सदर बचत गटाला महाराष्ट्र शासनाच्या ‘उमेद अभियान’ अंतर्गत ६ लाख रुपयांचे कर्ज मंजूर झाले होते. यापैकी १ लाख आधीच काढलेले होते, तर दोन हप्त्यांत सुमारे ४० हजार रुपयांची कपात झाली होती. त्यामुळे सदर दिवशी त्यांच्या बँक खात्यात ४.६० लाखांची रक्कम होती.
घटनेनंतर महिलांनी एरंडोल पोलिस ठाण्यात धाव घेतली असून रात्री उशिरापर्यंत गुन्हा नोंदवण्याची प्रक्रिया सुरू होती. पुढील तपास एरंडोल पोलीस करत आहेत. चोरट्यांचा लवकरच माग काढण्यात येईल, असे सूत्रांकडून सांगण्यात येत आहे.
📌 प्रमुख मुद्दे:
दिवसाढवळ्या महिलांकडून मोठ्या रकमेची चोरी
दुचाकीवरून आलेल्या अज्ञात भामट्यांची धाडसी कारवाई
‘उमेद’ अंतर्गत मंजूर कर्जाची रोकड लंपास
पोलिसांची तपास सुरू
🛑 नागरिकांनी अशा व्यवहारांमध्ये सावधगिरी बाळगावी, असा इशारा पोलिस प्रशासनाकडून देण्यात येत आहे.
