रोटरी क्लब ऑफ इंदापूर सेंट्रलच्या अध्यक्षपदी रो. मंदाकिनी डोंबाळे ;तर सचिव पदी रो. हेमलता मालुंजकर
रोटरी क्लब ऑफ इंदापूर सेंट्रलच्या संचालक मंडळाचा पदग्रहण समारंभ उत्साहात संपन्न
इंदापूर: रोटरी क्लब ऑफ इंदापूर सेंट्रलचा सन २०२६-२७ या नूतन रोटरी वर्षाचा पदग्रहण समारंभ मंगळवार, (दि. २१ जुलै २०२६ ) सायंकाळी इंदापूर येथील राधिका रेसिडेन्सी क्लब येथे अतिशय दिमाखदार सोहळ्यात पार पडला. या शानदार कार्यक्रमात रोटरी क्लबच्या नूतन अध्यक्षा म्हणून रो. मंदाकिनी ज्ञानदेव डोंबाळे यांनी, तर नूतन सचिव म्हणून रो. हेमलता वसंतराव मालुंजकर यांनी आपल्या पदाची सूत्रे हाती घेतली. रोटरी इंटरनॅशनलच्या 'क्रिएट लास्टिंग इम्पॅक्ट' (Create Lasting Impact) या संकल्पनेवर आधारित यंदाचे रोटरी वर्ष साजरे केले जात असून, समाजात कायमस्वरूपी सकारात्मक बदल घडवण्याचा निर्धार यावेळी व्यक्त करण्यात आला.
हा भव्य पदग्रहण सोहळा डिस्ट्रिक्ट ३१३१ चे डिस्ट्रिक्ट गव्हर्नर रो. नितीन ढमाले यांच्या हस्ते संपन्न झाला. या विशेष प्रसंगी प्रमुख अतिथी म्हणून डिस्ट्रिक्ट ३१३१ च्या फर्स्ट लेडी रो. नीलम ढमाले, DGE रो.विवेक दीक्षित आणि असिस्टंट गव्हर्नर रो. सविता भोर यांची प्रमुख उपस्थिती लाभली होती. कार्यक्रमादरम्यान सन २०२५-२६ या मागील रोटरी वर्षाचे मावळते अध्यक्ष रो. ज्ञानदेव डोंबाळे यांनी नूतन कार्यकारिणीकडे जबाबदारी सोपवून त्यांना पुढील यशस्वी वाटचालीस भरभरून शुभेच्छा दिल्या. इंदापूर शहर व परिसराच्या सर्वांगीण विकासासाठी आणि गरजूंच्या मदतीसाठी सामाजिक बांधिलकी जपत विविध प्रकल्प राबवण्यास आपली नवीन टीम कटिबद्ध असल्याचे नूतन अध्यक्षा रो. मंदाकिनी डोंबाळे यांनी स्पष्ट केले.
याच समारंभात सन २०२६-२७ च्या नूतन संचालक मंडळाची अधिकृत घोषणा करून त्यांना पदभार देण्यात आला. या नवीन कार्यकारिणीत खजिनदार म्हणून रो. आप्पासाहेब बंडगर, क्लब ट्रेनर म्हणून रो. ज्ञानदेव डोंबाळे, मेंबरशिप डायरेक्टर म्हणून रो. राजाराम सागर, आणि सर्व्हिस प्रोजेक्ट डायरेक्टर म्हणून रो. सुधीर शेंडे यांनी आपली जबाबदारी स्वीकारली. तसेच फाउंडेशन डायरेक्टर पदी रो. काकासो चव्हाण, लीडरशिप डेव्हलपमेंट डायरेक्टर पदी रो. मोरेश्वर कोकरे, युथ डायरेक्टर पदी रो. समीर सुर्यवंशी, आणि हॅप्पी व्हिलेज डायरेक्टर पदी रो. मोहन भोसले यांची नियुक्ती करण्यात आली आहे. याव्यतिरिक्त सार्जंट ॲट आर्म्स पदी रो. विष्णू पवार, पब्लिक इमेज डायरेक्टर म्हणून रो. अमृता शिंदे, व्होकेशनल डायरेक्टर म्हणून रो. चंद्रकांत तरंगे, आय.टी. डायरेक्टर म्हणून रो. सागर कांबळे, फेलोशिप डायरेक्टर म्हणून रो. जितेंद्र जैस्वाल आणि लिटरसी डायरेक्टर म्हणून रो. सुनिल टेळे यांचा या संचालक मंडळात समावेश आहे. सर्व नवनिर्वाचित पदाधिकाऱ्यांचे उपस्थितांनी टाळ्यांच्या गजरात स्वागत केले.
या दिमाखदार सोहळ्याला शहरातील अनेक मान्यवर, रोटरीयन्स आणि नागरिक मोठ्या संख्येने उपस्थित होते.
