जळगाव:- जिल्ह्यात अमली पदार्थांचे वाढते जाळे रोखण्यासाठी पोलिस प्रशासनाने जोरदार मोहिम हाती घेतली आहे. या मोहिमेअंतर्गत भुसावळमध्ये गुरुवारी पहाटे स्थानिक गुन्हे शाखेने एका मोठ्या कारवाईत मध्यप्रदेशातून आलेल्या तस्कराला रंगेहात पकडले. त्याच्याकडून तब्बल १० किलो २७५ ग्रॅम गांजा, मोटारसायकल आणि मोबाईल असा मिळून सुमारे ₹२.९० लाखांचा मुद्देमाल जप्त करण्यात आला आहे.
कारवाईची थरारक कहाणी...
गुरुवारी पहाटे साडेएक वाजताच्या सुमारास पोलिसांना माहिती मिळाली की, काळ्या रंगाच्या शाइन मोटारसायकलवरून गांज्याची वाहतूक भुसावळकडे होत आहे. वरिष्ठ पोलीस निरीक्षक संदीप पाटील यांच्या आदेशावरून पो. उपनिरीक्षक शरद बागल यांच्या नेतृत्वाखाली पथकाने हॉटेल सुरुची इनसमोरील महामार्गावरील सर्व्हिस रोडवर सापळा रचला.
थोड्याच वेळात संशयास्पद दुचाकी तेथे दाखल झाली. पोलिसांनी थांबवण्याचा इशारा दिल्यावर आरोपीने पळून जाण्याचा प्रयत्न केला; मात्र प्रसंगावधान राखून पथकाने त्याला शिताफीने पकडले. चौकशीत त्याची ओळख अनारसिंग वालसिंग भिलाला (३०, रा. शमलकोट, ता. झिरण्या, जि. खरगोन, मध्यप्रदेश) अशी पटली.
जप्त मुद्देमाल...
गांजा – १०.२७५ किलो (किंमत ₹२,०५,५००)
शाईन मोटारसायकल – ₹७५,०००
मोबाईल फोन – ₹१०,०००
एकूण किंमत : ₹२,९०,५००
कायदेशीर कारवाई...
या प्रकरणी भुसावळ बाजारपेठ पोलिस ठाण्यात आरोपीविरुद्ध NDPS Act 1985 कलम 20(b), 22 अन्वये गुन्हा दाखल करण्यात आला असून पुढील तपास सुरू आहे.
वरिष्ठांचे मार्गदर्शन...
ही कारवाई जिल्हा पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत यांच्या मार्गदर्शनाखाली पार पडली. स्थानिक गुन्हे शाखा व भुसावळ बाजारपेठ पोलिसांचे संयुक्त पथक या ऑपरेशनमध्ये सहभागी झाले.
जिल्ह्यातील अमली पदार्थविरोधी मोहिमेला वेग...
या धाडसी कारवाईमुळे जळगाव जिल्ह्यात अमली पदार्थांच्या अवैध वाहतुकीवर आळा बसण्याची शक्यता आहे. पोलिस प्रशासनाने अशा तस्करांविरोधात अधिक कठोर मोहीम छेडण्याचा निर्धार केला आहे. त्याचबरोबर नागरिकांनी संशयास्पद हालचालींची माहिती पोलिसांना द्यावी, असे आवाहन करण्यात आले आहे.
