कुपोषण निर्मूलनासाठी तीन दिवसीय प्रशिक्षण शिबीर 4 ते 6 नोव्हेंबर यादरम्यान यशस्वीपणे संपन्न
शिरूर – कुपोषण निर्मूलनाच्या दिशेने ‘ब्रिटानिया न्यूट्रिशन फाउंडेशन’च्या वतीने आयोजित तीन दिवसीय Behavior Change Communication (BCC) प्रशिक्षण शिबीर नुकतेच यशस्वीपणे पार पडले. या शिबिरात नंदुरबार, पालघर, अहमदनगर (अहिल्यानगर) आणि पुणे जिल्ह्यातील सामाजिक कार्यकर्त्यांनी उत्साहपूर्ण सहभाग नोंदवला.
शिबिरादरम्यान कुपोषण, पोषण आणि स्वच्छता, गर्भावस्था व स्तनपान काळातील आहार, तसेच पूरक आहार (Complementary Feeding) या महत्त्वाच्या विषयांवर संवादात्मक आणि मनोरंजक उपक्रमांच्या माध्यमातून मार्गदर्शन करण्यात आले. सहभागी कार्यकर्त्यांना या सत्रांमधून व्यवहार्य ज्ञान, उपयुक्त साधनसामग्री आणि प्रेरणा मिळाली.
या उपक्रमाचे प्रमुख उद्दिष्ट ग्रामीण आणि शहरी भागातील जनजागृती वाढवून कुपोषणावर नियंत्रण मिळवणे हे असल्याचे आयोजकांनी सांगितले. प्रशिक्षकांनी ‘वर्तन बदल संप्रेषण (Behavior Change Communication)’ या संकल्पनेवर विशेष भर देत समाजात आरोग्यदायी सवयी रुजविण्याचे महत्त्व अधोरेखित केले.
या प्रशिक्षणातून कार्यकर्त्यांना पोषणविषयक मोहिमा अधिक प्रभावीपणे राबविण्याची दिशा मिळाली असून, सहभागींच्या उत्साहामुळे कुपोषण निर्मूलनाच्या या अभियानाला निश्चितच नवी गती मिळेल, असा विश्वास आयोजकांनी व्यक्त केला
